"Сылнылык тӱня" рубрик, 2018 ий, Ага тылзын 25-ше кечыже

Aptalik марий мурылан шӱмаҥден

Статьян авторжо Анастасия Эманова

Йошкар-Олаште Индий гыч кӱшыл шинчымашым налаш толшо студент-влакым уремыште ужаш лиеш.Ик талантан рвезыж дене мыят палыме лийым. Лӱмжӧ — Акаш Рай.  Тудо Индийысе Бихар штатыште шочын, кызыт элын рӱдӧ олаштыже – Делиште – ила. Акаш Уттар-Прадеш, Пенджаб, Ассам, Гуджарат, Нью-Дели олалаште тунемын.

Еш.

акашИндийыште кок йочан еш кугулан шотлалтеш. Закон почеш кок йоча деч шукырак ышташ ок лий. Акашын ешыже кугу, но нуно тӱрлӧ штатыште илат.Ачаже, господин Джай Пракаш Рай, юж вийыште служитла, садлан кажне кум-вич ий гыч ик вер гыч вес верыш куснылеш. Аваже, госпожа Биджянти Рай, эн кӱлешан пашам шукта – пелашыжлан кугу эҥертыш да озавате. Викас Рай  изаж дене нигунам келшен огытыл, чӱчкыдын кучедалыныт, но пытартыш ныл ий жапыште Акаш тудым эн сай йолташыжлан шотла, усталык корныштат пашам ышташ кумылым луктеш да эре ой-каҥашым пуа. Тудо Викас дене моткоч кугешна, молан манаш гын тудо кугу кӱкшытыш шуын. Кызыт incubSENCE компанийыште менеджерлан тыршен пашам ышта. Нигунамат ик верыште ок шого, тудын илышыш шыҥдарышаш шуко шонымашыже уло.

Тунемме жап

Акаш кызыт Марий кугыжаныш университетыште 2-шо курсышто тунемеш. Молан лач Российыш толын? Шке элыштыже медицинский колледжлаште шинчымашым налаш моткоч шерге. Рвезе врач лийнеже. Тудо айдемын организмже нерген шукырак пален налнеже. «Врач – тыгай профессий, кудыж дене кугу оксам ыштен налаш да пагалымашым сулен налаш лиеш», — ойла Акаш. Садлануниверситетыште сайын тунемеш, шуко литературым лудеш. А тунем пытарымеке, шочмо элышкыже пӧртылаш шона.

Йошкар-Ола

Акашлан Йошкар-Ола моткоч келша. Тыште шып, чонлан ласка да шӱлашат куштылго. Тӱҥалтыште куштылго лийын огыл: палыдыме урем, еҥ-влак, тӱвыра. Руш йылмымат пален огыл. Кызыт рушла умыла, изиш кутыра.  Рвезым Российын игечыже ӧрыктарен. Йошкар-Оласе эҥер ӱмбал поснак сымыстарен, арам огыл йолташыже-влак дене тушто жапым пырля эртарат. «Но мый дечем йодыт гын, кудо элже сайрак: Россий але Индий? Мутат уке, мый вашештем Индий, молан манаш гын тушто мыйын шочмо пӧртем, ешем да йолташем-влак. Кеч-кӧланат шочмо кундем шерге», - ойла Акаш.

Хобби

Акаш гитар дене мастарын шокта да моткоч моторын мура. Интернетыште шке YouTube каналже уло. Видео-влакым войза да тушко вераҥда. Тыгак тӱрлӧ калык-влак келшымаш дене кылдалтше мероприятийлаште куштымыжым ужаш лиеш. Гитар дене шокташ шкеак YouTube полшымо дене тунемын. Тудын музыкальный образованийже уке. Акашын ачажат гитарылан шӱман. Шукерте огыл «MarSU’s got talent!» конкурсышто вийжым терген. Икымше турышто мэшапым (музыкальный произведений) йоҥгалтарен, а финалыште Алексей Воробьёвын «Сумасшедшая» мурыжым хинди, руш да англичан йылмыла дене мурен ончыктен да 2-шо верым сеҥен налын.

Яра жапыште волейбол дене модеш. Шке командыж дене МарГУ-што шуко гана ончылно лийыныт. Коньки денат мунчалташ кумылан. Уремыште чӱчкыдын крикет дене модмыштым шке шинчам денак ужынам.

Кочкыш

Тӱшкагудышто тӱрлӧ специйым ешарыман пареҥгым кочкыт, рисым, чапатим ямдылат. Национальный кочкыш кокла гыч алу матарым, матар панирым, кокос бурфим, кешыр гыч халвам палемдаш лиеш. Акашлан алу матер поснак келша. Таче тыланда кешыран халван рецептшым темлем.

Кешыр – 1 кг

Ушкал ӱй – 150 гр.

Шӧр – пел литр (шолтымо сайрак)

Сакырложаш – 150-180 гр (шерыракым йӧратеда гын, шукырак пышташ лиеш)

Изюм – 2/3 стакан

Кешью пӱкш (шинчаланже огыл) — 70-80 грамм. Олмешыже миндальым але арахисым ешараш лиеш.

Йоҥыштымо кардамон – 0,5 але 1 изи совла. Олмешыже йоҥыштымо корицым але гвоздикым пышташ лиеш.

Кешырым тыгыдырак тёрко гоч колтыза. Изюмым шокшо вӱдыштӧ шинчыктыза. 8-10 минут шинчыктымеке, вӱдым кышкалза да йӱкшыктарыза. Пӱкшым салмаште ӱй деч посна жаритлыза да вара тыгыдемдыза. Ушкал ӱйым келге салмаште левыктыза. Тушко кешырым пыштыза да 10 минут наре жаритлыза. Шӧрым да сакырым ешарыза да шолмыжым вучыза. Шолаш пурымеке, тулым иземдыза да эше 30 минут шинчыктыза. Пӱкшым ешарыза. Икмыняр жап гыч изюм дене кардамоным пыштыза да варыза. Вӱд пучымеке, кешырын шемемаш тӱҥалмешкыже жаритлыза, плита гыч кораҥдыза да йӱкшымыжым вучыза.

Марий муро.

Эн оҥай факт – Акаш Рай  Aptalik дене шукерте огыл палыме лийын да тудын «Кычалам моторем» мурыжым марла гитар почеш мурен. «Aptalik дене палыме лиймемлан моткоч йывыртенам. Вет тудо профессионал мурызо  да уста музыкант. Аранжировкыжо-влакым шулен колыштым. Викторын мӧҥгыштыжат лийынам, мурым марла пырля муренна да шкежат мыйым шукылан туныктен. Тыгак тудын весела койышыжо, мыскарам ыштылаш йӧратымыже да оптимист шӱлышыжӧ келшышт. Ончыкылык планна кугу», — каласкала Акаш.  Акашын ойлымыж почеш, «Кычалам моторем» мурын семже моткоч келшен, йылмым огеш пале гынат, мутшо ныжылгын шокта. Эсогыл рвезе тиде мурым шке йылмышкыже кусараш да мураш шона. Марла мурымыжым «Вконтакте» соцсетьыште колышт кертыда.

Автор Христина Александрова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: