"Мыланна латкудыт" рубрик, 2018 ий, Пеледыш тылзын 29-ше кечыже

Арбор кундемын юнкоржо

Статьян авторжо Анастасия Эманова

Лиана Семёнова Марий Турек район Арбор кундемысе Лоп ялыште шочын.  Ӱдыр Арбор школышто 8-ше классыш вончен.  Тунемаш нимынярат ок ӧркане. Тений Всероссийский олимпиадын муниципальный этапыштыже куд гана шке вийжым терген. Кум олимпиадыште сеҥыше-влак радамыште,  а кокытыштыжо ончылно лийын.

егЛиана -  «Ямде лий» йоча  газетын чолга юнкоржо. Тудын ешыштыже шке жапыштыже чылан «Ямде лий» газетыш возен шогеныт. Лианам тыршен возымыжлан 2014 ийыште «Марий юнкор слётыш» ӱжыныт. «Тушто налме шинчымаш возымо пашаште мыланем моткоч полшен шога. Слёт жапыште шуко поэт, писатель, журналист, корреспондент-шамыч дене вашлийынна. Тыгак Йошкар-Оласе «Марий Эл» радион, «Ямде лий», «Кугарня» да моло тӱрлӧ газет ден журнал редакцийын унашт лийынна. Юнкор слётышто шуко у йолташым муынам. Икманаш, ты слёт мыланем пеш чот келшен», - ойла самырык возгалыше.

Лиана 1-ше классыште тунеммыж годымак почеламутым возен. Тудо корак-влакын шокшо элла гыч толмышт нерген лийын. Эркын-эркын вес почеламут-влак шочаш тӱҥалыныт. Утларакше шочмо кундем да пӱртӱс нерген возаш йӧрата. «Икана йӧратыме «Ямде лий» газетым почым  да тушто «2015 ийын премийын лауреатше-влак» статья ыле. Шке лӱмемым ужмеке, моткоч куанышым. Мый поэзийыште ойыртемалтмемлан Антонов Ивук лӱмеш премийын лауреатше лӱмым сулен налынам. Премий шотеш планшет ден дипломым кучыктеныт. Чылан ойлат, пуйто почеламутым возен моштымо талант мыланем ава шӧр дене логалын», — манеш марий ӱдыр. Аваже Людмила Николаевна Семёнова «Ямде лий» газетын юнкоржо лийын. Утларакше почеламутым возен шоген, а 2008 ийыште «Кечыйол ден модшо эр» почеламут сборникше лектын.

Артек лагерьыште лиймыж годым «Юный журналист» кружокыш коштын. Артекысе «Остров А» газетыште «К нам приплыл огромный СОМ» статьяже ден изирак интервьюжат лектын.

Лиана — футболын кугу фанатше. Футбол деке Саша изаже шӱмаҥден. Тудо «Арбор» ФК командын игрокшо Марий Турек районысо «Восток» сборный командыште модеш. Лиана шкежат футболла модаш пеш йӧрата. Ончыкыжым врач, переводчик але журналист лияш шона.

Христина АЛЕКСАНДРОВА.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: