"Олимп" рубрик, 2018 ий, Пеледыш тылзын 1-ше кечыже

Байдарке дене писын иеш

Статьян авторжо Ирина Ямбаршева

Марий Эл гыч спортсмен байдарке дене ийме шотышто Российын первенствыштыже сеҥышыш лектын.

Артем КоровинТаҥасымаш Москошто «Крылатское» гребной каналыште лийын. Уло Россий гыч 600 наре спортсмен толын. Волжск ола гыч Артём Коровин 19 ияш марте ийготан юниор-влак коклаште вич шӧртньӧ да ик ший медальым налын. Ынде рвезе Италийыш Европын первенствышкыже кая. Тудо 28 июнь гыч 1 июль марте эртаралтеш.

Артём Олимпийский резерв училищыште тунемеш. Шым ияшыж годым Волжскысо школ пеленысе байдарке да каноэ дене коштмо отделенийышке чӱчӱжӧ Александр Евгеньевич Мещеряков конден, тудак — тренерже. Тыгак школышто йоча-влакым Владислав Евгеньевич Мещеряков тренироватла. Кажне ийын отделенийын воспитанникше-влак республикысе, Российысе таҥасымашлаште вийыштым тергат да сеҥышыш лектыт. Артёмынат тиде икымше сеҥымашыже огыл. Ӱмаште Саратовышто эртыше Российын первенствыштыже байдарке дене вич меҥгым иймаште ончылно лийын.

«Байдарке дене иймаш — спортын шкешотан, экзотический видше, вӱд дене кылдалтын. А вӱд чонлан ласкалыкым пуа, садлан мыланем байдарке дене кошташ пеш келша. Юл эҥерыште октябрь гыч август марте тренироватлалтына, сентябрьыште канена. Телым спортзалыште тренажерлаште заниматлена, ече дене коштына, бассейныште ийына. Тыгак кок арнялан сборыш Краснодар да Тимашевск олалаш миен толына. Москошто эртыше таҥасымаште сеҥышыш лекташ шоненам ыле, шонымашем шукталтын, тидлан моткоч куаненам. Кок ий гыч училищым тунем пытарем. Умбакыже Российын молодежный сборныйышкыжо логалаш, Европын да тӱнян чемпионатлаштышт вием тергаш шонем», — ойла рвезе.

Ирина Золотарева.

Фото — А.Коровинын альбомжо гыч.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: