"Шонанпылык ик тусшо" рубрик, 2018 ий, Пеледыш тылзын 1-ше кечыже

Иктыже весыж деч мастаррак

Статьян авторжо Ирина Ямбаршева

Кодшо арнян Йошкар-Олаште инвалид да начар тазалыкан еҥ-влак коклаште «Абилимпикс» республикысе чемпионат эртен. Школышто тунемше, студент да кугу ийготан мастар пашазе-влак – чылаже кудло наре участник — мом ыштен кертмыштым ончыктеныт.

IMG_6280Таҥасымаш-влак Марий политехнический техникумышто, Йошкар-Оласе технологический колледжыште, строительно-промышленный техникумышто лийыныт. Конкурсант-влак бисер гыч тӱрлӧ арверым ыштеныт, крючок дене пидыныт, пушеҥгым пӱчкеденыт, тӱрым тӱрленыт, кермычым оптеныт, ургеныт, йолчиемым ачаленыт, компьютер технологийым палымыштым ончыктеныт да молат. Тидлан ныл шагат пуалтын. Эксперт-влак писын, чаткан, сайын ыштымыштым акленыт.

Чемпионат годым Йошкар-Оласе технологический колледжыште «IT-Life без границ» форум эртен. Тушко IT-профилян профессийыште шке верыштым мушо инвалид, начар тазалыкан еҥ-влаклан пашам темлыше-влак толыныт.

«Абилимпикс» годым шагал огыл талантан мастар-влакым пален налме, тудо ойырен налме профессийын престижшым кӱшкӧ нӧлталаш полшен. «Абилимпикс» чемпионатын икымше гана лиймыжлан пел ий веле эртен, тиде жапыште участник-влакын радамышт икмыняр пачаш шукемын. Региональный рӱдерын вуйлатышыже, Марий политехничечкий техникумын директоржо Н.Морозовын мутшо почеш, тиде движенийыш ушнаш кумылан-влак эреак ешаралтыт. Палемдыде ок лий, Российысе национальный чемпионатыште мемнан резчикна-влак кок гана той призер лийыныт.

IMG_6233Наталья Ошаева:

- Мый Йошкар-Олаште илем. Марий политехнический техникумышто тӱрлызӧ да ЭВМ оператор специальностьлан тунемынам. Тӱҥ шотышто ырес, бисер дене тӱрлем, тыгак ленте дене тӱрлен онченам. Ты пашалан 10 ияшем годым авам Римма Александровна кумылаҥден. Тудо ондак марий тӱрым тӱрлаш 14-ше номеран гимназийыште, 2-шо номеран школышто, тыгак «Космос» да «Радуга» йоча клублаште туныктен. Шке пашам-влакым йолташем-влаклан пӧлеклем, южыжым ужалем. Вконтакте соцсетьыште шке группем (https://vk.com/club48580244) уло.

Ырес дене тӱрлымӧ деч посна коляске дене куштем, маникюрым ыштылам. Ондак зумба дене заниматленам. Тиде — фитнес куштымаш. Тыгак тӱрлӧ мастер-класслаш эреак кошташ да иктаж-могай у пашалан тунемаш тыршем.

Иван Речкин.

q05

Куженер поселко гыч Алексей Ефремов ик кид дене кермычым опта, тудлан волентер полша

q06

Сергей Юртиков — бисероплетений номинацийыште сеныше юниор

IMG_6298 IMG_6312 q02

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: