"Кугарнягудо" рубрик, 2018 ий, Пеледыш тылзын 1-ше кечыже

Йоча мыланна илаш вийым пуа

Статьян авторжо Ирина Ямбаршева

Йоча-влакым аралыме тӱнямбал кече дене пырля 1 июньышто тыгак Тӱнямбалсе ача-ава-влакын кечышт палемдалтеш. Ты пайрем ача-ава-влакым келшен илаш ӱжеш, йоча-влакым пиалан ешыште ончен кушташ кӱлмӧ нерген ушештара.

xBk3o-18pBQ«Пӧръеҥ – вуй, а ӱдырамаш – шӱй: кузе шӱй пӱтыралеш, тугела вуй савырна», маныт калыкыште. Калык дене ӱчашаш от тӱҥал. Но, шонем, пӧръеҥ ден ӱдырамаш кокласе кыл кажне ешыште тӱрлӧ. Кӧ могай сомылым шукта – тидым вашла йӧратыше еҥ-влак шке гына палат. Но ала-молан еш темым тарватыме годым ӱдырамаш нерген мутым лукмо шуэш. Ӱдырамаш – эн ончычак ава, садлан тудын ӱмбалне – кугурак «нумалтыш».

Кызытсе илыш пӧрдемыште ӱдырамаш кузе илен моштышаш? Ешым да пашам ушаш куштылго мо? Тидын нерген кум шочшан ава да амалкалче Надежда Моисеева дене мутланышна.

– Надя, тыйым шукын поэтессе Надежда Эмыкан семын палат. Поэзий шӱлышан айдеме кузе амалкалче лийын?

– Марий кугыжаныш университетым тунем пытарымеке, мый шке специальность денак пашам ышташ шоненам, сандене Йошкар-Оласе 2-шо номеран школышко туныктышо-влакын радамышкышт ушненам. Тыште пашам ик ий утларак гына ыштенам. Икымше икшывем шочмеке, пелашем дене икмыняр жаплан ялышке илаш куснышна. Тунамак озанлык сатум ужалыше кевытым почна. Пелашем тунам Москошто пашам ыштен, садлан сатулан коштмыжо, тӱрлӧ документла дене куржталмыже – чылажат мыйын ӱмбалне ыле.

– Изи йоча дене чыла ыштен шукташ куштылго огыл. Полышкалышет лийын, очыни.

– Икшывым ончаш авам полшен, тидын шотышто тудо кызытат эн тӱҥ эҥертыш. А иктаж-могай паша дене кайымем годым олмешем ужалаш я акамым, я ачамым коденам. Ончыч пелашемын Моско гыч толмыж годым веле сатулан коштына ыле. Вараже мый шкеак машинам виктараш тӱҥалынам. Кызыт пелашем йӧршынлан пӧртылын, садлан кевытна дене кылдалтше сомылым шукташ куштылгырак.

– Таче ужалыше-влак еҥ-шамычым шке векышт тӱрлӧ семын савыраш тӧчат. А тый?

– Чынжымак, амалкалче-влак коклаште конкуренций моткоч кугу, но мый тидын деч ом лӱд. Ме Советский район Роҥго селаште ик кугу еш семын илена, ваш-ваш эре полшена да эҥертена. Кевытым почмеке, моткоч шуко сай тыланымашым колынам. Кугурак-влакын каҥашыштым эре шотыш налынам. Наледаш толшо-влак мыланем ӱшанат, а мый – нунылан.

– Кевытыште тыршыме деч посна тый Роҥго тӱвыра пӧртыштӧ пашам ыштет. Молан лач тӱвыра пӧрт, а, мутлан, школ огыл?

– Мый клуб пеленак кушкынам. Ачам, поэт Альберт Васильев, шуко жап «Роҥго памаш» ансамбльын ик эн тале участникше лийын, сандене изиэм годымак репетиций жапыште кулис шеҥгелне кушташ тунемынам. Варажым, визымше классышке коштмем годым, Роҥго клубын директоржо Алексей Викторович Волков мемнам, изи йоча-влакым, марий ансамбльыш чумырыш. Тудо волгыдо жап кызытат шинча ончылнем, вет ме кугу артист-влак семынак тӱрлӧ клубышто концертым ончыктенна, мемнан деч посна воктенысе яллаште ик ял пайремат эртен огыл. Чаманаш кодеш, Алексей Викторовичын вес вере пашаш куснымекыже, Роҥго клубышто гармонь йӱк ден марла мурымаш-куштымаш шыпланышт. Тидыже мыйын чонем тургыжландарен, кызытсе тукымым марий сем почеш кушташ туныкташ таратен. Адакшым мый Палантай лӱмеш тӱвыра да сымыктыш колледжыште тунемынам, любительский ушем-влакым вуйлатыше да туныктышо специальностьым налынам.

– Куштен моштымет ачат деч тугеже. Возыметат Альберт Александрович дене икгайрак, маныт. Южыжо «ачаже возен пуа» манашат тоштеш…

Умбакыже 1 июньысо газетыште лудса.

Алена Яковлева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: