"Улам мый Рве-зы-лык!" рубрик, 2018 ий, Пеледыш тылзын 19-ше кечыже

Ме огыл гын, кӧ марий йылмынам арален кода?

Статьян авторжо Анастасия Эманова

Тыге шонкала школышто тунемше ӱдыр Виктория Мамаева.

Викан возымо тӱрлӧ материалже «Кугарня» газетыште ятыр гана савыкталтын. Марла арун мутланыше, раш да сайын возен моштышо тунемше дене палыме лияш шукертак шоненам.

мамаева1Кужэҥер район Кугу Регеж ялын шочшыжо изинек марий шӱлышан кушкын. Тошто марий куштымашым куштен, мурен мошта, почеламутым лудаш йӧрата, марий койышыжым тӱрлӧ мероприятийыште ончыкта. Тыгай ӱдыр дене кузе от кугешне! Сеҥымашыжлан кузе от куане!

Вика 9-ше класс марте Йывансола тӱҥ школышто тунемын. А кызыт Йӱледӱр кыдалаш школышто 11-ше классыш вончен. Тудо марий йылме ден литературым тунемаш йӧрата. Кок ий почела марий йылме дене республикысе олимпиадыште 2-шо да 1-ше верлам налын. «Витя изамым ончен, мыят марла кушташ кумылаҥынам.  Тудо изиж годсек мураш-кушташ йӧратен, гармонь дене пеш сылнын шоктен мошта, районысо «Мурсескем» ансамбльын, тыгак «Марий памашын» участникше лийын. Изирак улмем годым Йывансола клуб пеленысе «Алсаска» йоча ансабльыш икмыняр ий коштынам, а ынде тусо «Мурсескем» ансамбльын участницыже улам. Тиде ансамбльым Евгений Анисимович Каменщиков 1979 ийыште чумырен да кызытат вуйлатен шога. Тиде жапыште тушто 130 наре еҥ мурен-куштен. Ансамбль дене пырля тӱрлӧ вере лийынам, кок ий ончыч Шкетан лӱмеш Марий театрыште куштенам. Тиде чоныштем келге кышам коден. Ансамбль дене шуко съемкышто участвоватленам. Кужу жаплан ушеш кодшо – тошто годсо марий сӱан йӱлам модын ончыктымаш лийын. Тудым ӱмаште март тылзыште ончыктымо. Мый ӱдырын рольжым модынам. Тылеч посна тений «Шорыкйол» пайрем йӱла дене кылдалтше сценкым ямдылыме. Тиде мероприятийыштат участвоватлаш моткоч келшен, шуко ум пален налынам», – каласкала В.Мамаева.

Виктория – поэзийлан шӱман ӱдыр. Тудо кажне ийын гаяк «Живая классика» да моло тӱрлӧ лудмо конкурсышто мастарлыкшым ончыкта да сеҥыше-влак радамыш чӱчкыдын логалеш. «Марий поэт ден писатель-влакын творчествыштым ойыркалымаш уке. Мыйын шонымаште, кажнын произведенийже шкешотан да шке семынышт сылне. Мыят возкалаш тыршем. Но почеламутем шукыжак огыл. Чыла эше ончылно, шонем. Возкалымем «Ямде лий», «Кугарня» газетлаште савыкталтыныт. Тидлан эре куанем», -  ойла тунемше.

Кызыт ӱдыр журналистике пашалан шӱмаҥын. Ончыкыжым журналист корным ойырен налаш шона. Но кӧ пала, ала идалык жапыште вес пашалан шӱмаҥеш. «Изиэм годым коча-ковам семынак туныктышо лияш шоненам. Эре школла модынам, йолташ ӱдырем-влакым туныктем ыле. Иктаж-кӧ «Кушмекет, кӧ лият?» йодын гын, кажне гана туныктышо лиям манын вашештенам. Но ынде журналист лияш шонем. 11-ше классым тунем пытарымеке, экзаменым сайын кучен, журналистлан тунемаш пурынем. А вара шочмо Марий Элыштак ойырен налме профессием дене пашам ыштынем», - манеш Виктория.

Мамаева марий улмыж дене моткоч кугешна. Тудо ойла: «Кызыт шукынжо рушла мутланаш тыршат. Южышт шочмо марий йылмыштым йӧршеш огыт пале але, палат гынат, кутыраш вожылыт. Мыйын шонымаште, тиде чын огыл. Руш йылмымат палыман, но марий еҥ шочмо йылмыжым мондышаш огыл. Нигушто нигунам марий улмына дене вожылшаш огынал. Ме огыл гын, кӧ марий йылмынам арален кода?» 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: