"Тыйын шочшет эрвелмарий" рубрик, 2018 ий, Пеледыш тылзын 29-ше кечыже

Новокузнецк олаште – марий подполковник

Статьян авторжо Ирина Степанова

гафиев1Вес кундемыште илыше марий-влак шукынжо ала-молан дыр кеч ик гана Йошкар-Олам ужаш шонена. Вет тудо марий калыкын рӱдыжӧ, марла кутырышо, марла чонан да марий лӱман ола. Тудо – ЙОШКАР-ОЛА. Тышке толын, кажне марий еҥ шканже могай-гынат вийым налын кая. Тиде тыглай мут гына огыл.
Теве Пошкырт вел Бурай районысо Кугу Шӱкшан ялеш шочын-кушшо Леонид Гафиеват эреак Йошкар-Олам ужаш шонен, да шонымашыже тений веле шукталтын: Пеледыш пайремлан пырля тунемме йолташыже да землякше Александр Апакетов деке унала толын кайыш. А тиддеч ончыч уло Россий мучко коштын савырнен, манаш лиеш. Вет тудо Россий армийын офицерже, марий подполковник. Кушко Родина колта, тушто службым эртыман.

Тора Кузбасс сымыстарен
гафиевКызыт Л.Гафиев Кемерово областьысе (тудым эше Кузбасс маныт) Новокузнецк олаште ила да тысе ик охранный предприятийыште вуйлатышын полышкалышыжлан тырша.
А йоча да самырык жапше мотор Кугу Шӱкшан ялыште эртен. Каласыман: ты татар районышто лач кум марий ял веле уло: Кугу Шӱкшан, Изи Шӱкшан да Арсланбек.
— Шкенан ялыште 9 классым пытарымеке, авамын темлымыж почеш (а тудо тӱҥалтыш класслам туныктен) 1977-1981 ийлаште Благовещенск оласе педучилищыште тунемынам. Тиде вер нерген ушыштем сай шарнымаш веле кодын. Тудо мыланем шуко сай йолташым пӧлеклен, — палемда газетнан тачысе унаже.
Но рвезе туныктышо лияш огыл, а военныйын профессийжым налаш шонен да училище деч вара вигак Кемерово оласе связь шотышто высший военный училищыш тунемаш пурен. 1985 ийыште самырык лейтенантым Краснодар крайысе Крымск олашке связистлан служитлаш колтат. Ты жаплан тудо ӱдырым налын шуктен. Пелашыже Кемерово областьысе Юрга ола гыч, бухгалтерлан эре ыштен. Л.Гафиев Крымскыште 1991 ий марте служитлен. Служба тудлан келшен, келшен тусо кундем, Шем теҥыз мартеат тора огыл. Ешыште кок ӱдыр шочын. Тудо коммунист партийыш пурен. Тунам коммунист-влакым карта замены манме программе почеш тӱрлӧ вере шке опытыштым палдараш колтеныт. Тыге Леонид ешыж дене тора Йӱдвелыш, Норильск олашке, логалын. Тушто ныл ий служитлен. Лач тыгодым, 1990-ше ийлаште, Российын вооруженный вийыштыже вашталтыш тӱҥалын. Йӱдвелыште часть-влакым шагалемдаш палемденыт, шкалан службо верым кычалаш кӱлын. Тыге еш 1994 ийыште уэш Кемерово кундемыш пӧртылеш, Л.Гафиев Юрга олаште мотострелковый бригадыште служитлаш тӱҥалын. Ты бригаде дене пырля Чечняште кокымшо сарыште лийын. Офицер-влакым военный комиссариатлашке колташ палемдымеке, тудо ты кундемысе Киселёвск оласе да вара Новокузнецкысе комиссариатлаште ыштен. 2009 ий февральыште армий гыч уволитлалтын. Чумыр стажше – 29 ий.
Кок ийлан ик гана – шочмо ялыш

«Кызыт пенсийыште улам гынат, пашам ыштем. 2002 ий годсек Новокузнецкыште илена. Ондак кок ий ик кугу чоҥымо компанийыште лӱдыкшыдымылык службым вуйлатенам. Кызыт ик охранный предприятийыште директорын пультовой охране шотышто алмаштыже улам», — ойла тудо.
Гафиевмытын йоча-шамыч кушкын шуыныт. Кугуракше, Жанна, Кемеровысо кугыжаныш университетым тунем лектын, кызыт аважын шочмо Юрга оласе налоговый инспекцийыште пашам ышта. Юлия Новокузнецкыште наказанийым шуктымо шотышто кугыжаныш институтым тунем лектын. Новосибирскыште ила да тысе наказанийым шуктымо шотышто тӱҥ управленийыште пашам ышта, капитан. Тудо кова-кочалан эрге уныкам пӧлеклен.
«Кызыт Новокузнецкыште пелашем дене коктын веле илена. Шонена иктаж йоча дек лишкырак каяш», — мане марий подполковник.
«Шочмо ялышкыда чӱчкыдын толыда мо?» — йодым тудын деч. «Кугу Шӱкшаныште ава-ачан суртышт уло. Тудым ме огына кудалте. Мый дечем посна эше акам ден изам улыт. Нуно Свердловск областьыште илат. Акам ден курскам кажне кеҥежым ялыштак илат. Мыят кок ийлан ик гана ялышкем коштам. Новокузнецк гыч машина дене кудал толам. Тушто ыштышаш паша шуко. Толаш тыршем июньышто. Вет лач тунам мемнан Пошкырт велне Сабантуй-влак эртат. Тушто чыла палымым, родо-тукымым ужаш, кутыраш лиеш», — пелештыш чеверласышыла Л.Гафиев.
Ирина Степанова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: