"Шинчымаш кугорнышто" рубрик, 2018 ий, Пеледыш тылзын 1-ше кечыже

Школ чапле, но спортзал уке

Статьян авторжо Ирина Ямбаршева

Морко кундемын ик эн сылне лукшо – Унчо села — нерген, очыни, шукынжо колыныт. Тыште чынжымак марий шӱлыш озалана. Но селаште ик эн кугу проблеме уло. Школым латикымше ий алят чоҥен пытарен огыт керт. Тидыже школышто тунемше да туныктышо-влакын, поснак директорын, чоныштым чот туржеш.

Унчо7Унчо1Кушшо тукым – элнан ончыкылыкшо. Йоча-влак сайын тунемышт манын, республикыште шуко ышталтеш: тӱрлӧ проект илышыш шыҥдаралтеш, конкурс-влак эртаралтыт, школлаште материально-технический базе уэмдалтеш. Тиде, конешне, сай. Ӧрмаш веле, кузе Унчо кыдалаш школ але мартеат мучаш марте чоҥалтын огыл.

Тыште 219 йоча тунемеш

Школ кугу. Тидыже тора гычак коеш. Класс-влакат волгыдо да чапле улыт. Тыште 32 ий ты селанак шочшыжо Сергей Андропович Григорьев (снимкыште) директорлан пашам ышта. Тылеч ончыч тудо Унчо школыштак математикым кандаш ий туныктен. 1978 ийыште Н.Крупская лӱмеш Марий пединститутысо математике да физике факультетым тунем пытарен. Ӱмыржӧ мучко образований аланыште тырша, йоча-влаклан чон шокшыжым пуа. «Школыштына кандаш ял гыч 219 йоча тунемеш. Ӱдыр-рвезе-влакым кок автобус коштыкта. Тений 12 йоча 11-ше классым тунем пытара, да 24 икшыве – 9-ше классым. 9-ше класс деч вара лу наре йоча Атня селасе Габдулла Тукай лӱмеш ялозанлык техникумыш (Татарстан) тунемаш каяш шона. Тушто туныктымо базе моткоч сай да Йошкар-Ола дене таҥастарымаште тушко кошташ лишылрак.

2003 ийыште федеральный программе почеш школын у зданийжым чоҥаш тӱҥалыныт. А 2007 ийыште ме тушко тунемаш пуренна. Тунам эше школым мучаш марте чоҥен пытарыме огыл ыле. Лачак тушто спорт, актовый зал-влак, столовый да эше икмыняр класс лийшаш ыле. Ынде латикымше ий вучена. Чоҥен пытараш окса уке манын ойлат. Йоча-влак тошто школыш кочкаш коштыт, тӱрлӧ мероприятийым актовый залыште огыл, а коридорышто эртарена, физкультур урокым – шукыж годым тӱнӧ, йӱштӧ але йӱран годым тошто изи спортзалыште. Чон коршта. Школым чоҥен шуктымак шуэш. Тунам пашана эшеат чот вораҥеш манын шонена. Спортыштат, тӱрлӧ культур мероприятийыштат ончылно лияш тӱҥалына, — палемда директор.

Унчо4Татар йочат марла мутлана

- Йоча-влак ушан, уста, артист койышан улыт. Тӱрлӧ кружок занятийлаш кумылын коштыт. Выпускникна-влак денат пеш кугешнена. Шукынжо сай паша верыште улыт, илышыште кугу кӱкшытыш шуыныт. Марий улмышт дене кугешнат, марла мутланаш огыт вожыл.

Йоча-влак марла мутланышт, шочмо йылмыштым йӧратышт манын, кугу пашам ыштена. Ача-ава-влак денат тидын шотышто мутланена. Нуно шкештат марий шӱлышан улыт, садлан йочашт дене марла мутланат. Шлань гыч кандаш татар еш гыч, Уньжа гыч ныл татар еш гыч йоча-влак школыштына тунемыт. Нуно марий йылмым сайын палат. Ача-аваштат йочаштлан марий йылме ден литературым туныкташ тореш огытыл. Ты предмет дене олимпиадылаште мемнан школ гыч участник-влак эреак ончыл верым налыт.

Чапле спортзална уке гынат, йоча-шамыч спорт дене уло кумылын заниматлат, занятий-влак утларакшым тӱнӧ эртат. Тидлан кӧра, очыни, нуно шагал годым черланат. Спортсменна-влак пеш писе улыт. Ӱмаште Радио кечылан пӧлеклалтше куштылго атлетике дене республикысе таҥасымаште школнан командыже икымше верым налын ыле.

Школ пелен йочасад уло. Тушко 71 йоча коштеш. Воспитатель-влакге чылаже 32 туныктышо пашам ыштена. Шукынжо Унчо кундем гычак улыт. Тыршена, илышлан куанен илена. Мо эше пиаллан кӱлеш? Лач школым мучаш марте чоҥен шукташ», — манеш Сергей Андропович.

Анастасия Эманова.

И.Речкинын фотожо-влак.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: