"Шинчымаш кугорнышто" рубрик, 2018 ий, Пеледыш тылзын 1-ше кечыже

Экзаменлан марий йылмым ойырат

Статьян авторжо Ирина Ямбаршева

Советский районышто ик эн чапланыше кундем – Кельмаксола вел. Ты ялыште кок пачашан школ умбачынак моторын коеш. Таче Кельмаксола кыдалаш общеобразовательный школышто 120 наре йоча шинчымашым пога, 15 туныктышо пашам ышта.

Кельмаксола5IMG_4616Тышке Шуарсола, Люперсола, Эҥерсола, Шудасола, Руясола, Лайсола ялла гыч ӱдыр-рвезе-влак тунемаш коштыт. Школ 30 ияш веле гынат, тудым тунем лекше-влак коклаште самырык шанчызат, актёрат, военный да телевидений пашаеҥ-влакат улыт.

Кельмаксола школышто чапле тоштер пашам ышта, тудым Л.Киртаев вуйлата. Тиде школ марий шӱлышан улмыж дене ойыртемалтеш.

«Мемнан школышто марий йылмым тунемаш нигӧ тореш огыл, тыгай йодышыжат ок лек. Тӱрлӧ погынымашым, планёркым шочмо йылмына дене эртарена, йоча-влак экзаменлан марий йылмым ойырат», – каласкалыш школ директор А.Халтурина. Алевтина Владимировна йоча-влакын чолга, мураш-кушташ йӧратыше да пашаче улмыштым палемдыш. Нуно тӱрлӧ конкурслаште шке вийыштым тергат. Ача-ава-влак эре полшен шогат манын каласыш. Кузе полшат? Мутлан, школышто тунемме ий мучаш мартепареҥге ситен шуын огыл гын, ты ситыдымашым ача-ава-влак вашке тӧрлат: пареҥгым мӧҥгышт гыч кондат!

Такшым гын Кельмаксола школышто пареҥгым шкеак ончен куштат, сад-пакчамат кучат. Тыште улшо пашам йоча-влак шкеак шуктат, вуйым огыт шупш. Мемнан толмо годымат ӱдыр-рвезе-влак, мӱкшла койын, пакчаште тыршат да школ кудывечым эрыктат ыле.

Школ вуйлатышын ойлымыж почеш, икте тургыжландара: йоча-влак кажне ийын шагалемыт. Йоча укелан кӧра тений 11-ше класс лийын огыл. Икымше сентябрьыште классышке тунемаш 8 йоча гына толшаш.

Тыште туныктышо-влак шке пашаштым чон почын шуктат. Шке жапыштыже йӧратыме школыштым кыдалаш гыч тӱҥ школыш савыраш пуэн огытыл, йоча-влаклан 11-ше класс марте тунемаш йӧным ыштеныт. Садлан Кельмаксола школышто тыршыше-влаклан тыланыме шуэш: пашада сай лектышан лийже, тыланда куаным кондыжо!

Алёна Яковлева.

И.Речкинын фотожо-влак.

IMG_4419 IMG_4431IMG_4382

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: