"Рубрик деч посна", 2018 ий, Сӱрем тылзын 11-ше кечыже

Мурым, почеламутым воза

Статьян авторжо Ирина Степанова


DSCN5243Галина Баширова (фотошто тышкыла ончен кушта) Мишкан селаште ила. Моткоч лирика кумылан ӱдырамаш: почеламут, муро-влакым воза. Шкеж нерген тудо тыгерак ойла:
- Мый 1955-ше ий 11 сентябрьыште Мишкан районысо Ош Памаш ялеш шочынам. Школым тунем лекме деч вара продавецлан пашам ыштенам. А кызыт пенсийыште улам. Шуко жап Мишкан тӱвыра полат пеленысе драмтеатрышке коштынам. Ятыр спектакльыште роль-влакым модынам. Тунамак Мишкан селаште Коммунхоз пеленысе «Локама» ансамбльыште муренам. Шкенан Мишкан район мучко шуко вере концерт дене коштынна, Марий Элысе Морко районышто мастарлыкнам ончыктенна. Кызыт «МуроЭм» ансамбльыште мурем, концертым вӱдем.
Мураш да кушташ изинекак йӧратем. Рвезе годым ялысе клубышко мураш да кушташ коштынна. Тиде жапыште такмак-влак шкеак шочаш тӱҥалыныт. Шукыжо калык коклашке шыҥен. А кызыт чонемын йодмашыже кугемын. Чыла эртен кодшо илышемым йыплен, курымешлан кайыше еҥем-влакым шарналтен, у муро-влакым шонкалем да шке семынем муралтен колтем.
Ты чолга ӱдырамашын икмыняр мурыжым «МуроЭм» коллектив мура.
Аваем
«Ош тӱняште илыш корным
Пеҥгыдын кӱлеш тошкаш», -
Аваемын сугынь мутшым
Ок лий курымеш мондаш.
Эркын вуйым ниялталын,
Юзо мут дене ойлен
Неле-йӧсым чот чыталын,
Илаш тудо туныктен.

Мурымат нигӧ деч сылнын
Ямле сем дене мурен.
Кумылемым авалталын,
Семже чонышкем шыҥен.

Шарналтен авамын семжым,
Сылне мурыжым мурем.
Суксо гай яндар чурийжым.
Эре чоныштем ашнем.

Кечыйолла ырыкталын,
Муро чоным луштара.
Пӧлекла уэш вий-алым
Да ӱшаным пӧртылта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: