"Кугарнян кастене" рубрик, 2018 ий, Сӱрем тылзын 13-шо кечыже

Тале футболист-влак

Статьян авторжо Ирина Степанова

Футбол дене тӱнямбал чемпионат мучашке лишемеш. Эше ик гана тендам тале футболист-шамыч дене палдарена.
игнашевичСергей Игнашевич
Хорватийын сборныйжо дене модмо деч вара Моско ЦСКА-н да Россий сборныйын защитникше Сергей шке карьерыжым пытарыме нерген увертарыш.
Тудо 1979 ий 14 июльышто Москошто шочын. Ачаже – белорус, Минск область гыч илаш толын, аваже – чувашке, Чуваший гыч. 1988 ийыште ачаже Сергейым «Торпедо» клубыш конден, но ондакше тудым тушто його йочалан шотленыт. 1997 ийыште тудым «Спартак» молодежный командыш налыныт да тӱҥ защитниклан шогалтеныт. Тиддеч вара рвезе футболым чотак йӧратен шынден. Шке карьерыштыже тудо шуко командыште модын, а 2010 ий мартыште ЦСКА-шке толын. Российын сборныйыштыжо 2002 ийыште модаш тӱҥалын. Игнашевич штрафнойым моткоч сайын чумал пуэн мошта, эсогыл — тора гычат, карьерыштыже штрафной гыч 28 голым пуртен. Вуй денат мечым перен кертеш: 23 гол. Пенальтим сайын чума: 12 гол. Цельыш шуаш тыршыше, боец да лидер койышан. Тудо ныл йочан ача. 19 ияш Роман ден 16 ияш Дима икымше ватыж деч улыт. Кызытсе пелашыже — Наталья — дене 10 ияш Сергей ден 6 ияш Тимофейым куштат. Эрге-влак коктынат ЦСКА-се футбол командыште заниматлат.

Лука Модрич
модричХорватийысе сборныйын капитанже, Испанийысе «Реал Мадрид» клубын футболистше 1985 ий сентябрьыште Задар олаште шочын. Югославийыште сар тӱҥалмеке, 1990 ийлаште ешге Затон олашке илаш кусненыт. Тудо изинекак верысе спорт академийыш футбол дене модаш коштын, кеч южгунам тидлан ачажлан ешысе пытартыш оксам пуашыже пернен. 2002 ийыште рвезе Загреб оласе «Динамо» команде дене контрактым подписатлен. Виян футболистым Английысе «Тоттенхэм Хотспур» командыш ӱжыт. Лач тыгодым команде икмыняр матчыште сеҥалтеш, да Модрич ден Бентым шукын титаклаш тӱҥалыт. Тыште тудо ик эн сай футболист лиеш. А 2012 ийыште Мадридысе «Реал» команде дене контрактым подписатла. Хорватийын сборныйыштыжо 2006 ий годсек модеш. Модрич кок йолжо денат сайын чумен мошта, пасусо чыла позицийыштат сайын модеш.
2010 ийыште ӱдырым налын. Тудо ийынак Иван эргышт да 2013 ийыште Эмануэль ӱдырышт шочыныт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: