"Рубрик деч посна", 2018 ий, Сорла тылзын 24-ше кечыже

Артист Марина — мурызо Арина

Статьян авторжо Вероника Мустаева

Ме тудым мурызо Арина лӱм дене палена, а чын лӱмжӧ – Марина Воронцова. f3KDojpnt3E
Тудо Шернур район Чылдемыр ялыште шочын-кушкын. Ондак Купран ялысе, вара Шернур посёлкысо 1-ше №-ан школышто тунемын. Кызыт –  М.Воронцова М.Шкетан лӱмеш Марий кугыжаныш драмтеатрын артисткыже.
Марина йоча годымак мурызо але артист лияш шонен. «Изиэм  годым бразильский сериалым телевизор дене ончыктеныт.  Иктыжым сайын шарнем,  «Просто Мария» маналтеш ыле. Валя кокам дене (авамын акаже) сериалым ончымеке, коктын эре  рольым модынна. Мый – Мария, тӱҥ герой,  кокам – Виктор, Мариян качыже. Телевизор дене концерт каен гын, мыят, авамын тувыржым чиен, микрофон олмеш локоным кучен, концертым ончыктенам. Купран школыш тунемаш кайымеке, рисований, музык уроклам йӧратенам, но  школышто кружок-влак лийын огытыл, садлан мураш йӧратыме кумылем  кодын», — каласкала мурызо.
Купран школышто индеш классым пытарымек, Марина Шернур посёлкыш тунемаш каен. Класс вуйлатышыже Лилия Волкова лийын. Лилия Владимировна марий йылме ден литературым туныктен. Тудо ӱдырын мураш йӧратымыжым пален налын, тиде моштымашым умбакыже шуяш полшен. Музыкым туныктышо Лариса Беликовалан Маринан мураш йӧратымыж нерген каласен, да туныктышо  Маринан талантшым вияҥдаш полшен.
«Лариса Аркадьевна   мылам район ден республикысе конкурслашке каяш  ямдылалташ полшен. Сеҥыше радамыш шуко гана логалынна. Шернур тӱвыра пӧрт пеленысе «Пӧлек» ансамбльыш мураш-кушташ коштынам. Лилия Владимировна ден Лариса Аркадьевна огыл гын, ала мурашат ом тӱҥал ыле. Нунылан пеш кугу тау», — ойла Марина.
Школ деч вара И.Палантай лӱмеш тӱвыра да сымыктыш  колледжыш вокальный пӧлкаш тунемаш пурен. Тыгодымак МарГУ-што тӱвыра да сымыктыш факультетыш  этнокультурологлан заочно тунемын, но пытарен огыл.
«Колледжыште тунемаш оҥай ыле. Кызытат тиде полатыш пурымеке, чонлан ласкан чучеш. Тушто  мыйым Марий Элын сулло артисткыже  Галина Шабрукова мураш туныктен. Тудын дене кугу олалаш конкурсыш миен коштмо. Мылам тыгак Россий Федерацийын сулло, Марий Элын калык артисткыже Маргарита Медикова  чот полшен. Тунам тудо «Мастерство актера» ден «Сценическая речь» предметлам вӱден»,  — шарналта артистке.
Колледжыште нылымше курсым тунем пытарымыж годым сольный концертше эртаралтын. Тушто Марина калык мурым, романсым, опер гыч арий-влакым мурен. Ончыкылык артистын классике репертуарже пеш поян лийын.
«Умбакыже  Москосо ГИТИС-ыш музыкальный факультетыште  але  Шнитке лӱмеш институтыш опер факультетыште  тунемаш шоненам. Иктышкыжат пурен кертын омыл. Шочмо кундемыш пӧртылмек, Москосо Щепкин лӱмеш кӱшыл театральный училищыш Шкетан лӱмеш театр студийым пога манын колынам. Тергымашым эртымеке, мыят тиде студийыш логалынам», — палдара мурызо.
Москошто драме артист профессийым налын, Марина М.Шкетан лӱмеш театрыш пашаш толын. Кызытат туштак пашам ышта.
«Муро аланыш логалаш Андрей Герасимов полшен. Тудын  дене 2-шо курсым пытарымем деч вара палыме лийынам. Икымше муро «Йӧратымашым ок лий ондалаш» маналтын. Андрей Сергеевич дене 10 наре мурым возенна. Тудын мурыжо-влак шкешотан да сылне улыт. Кызыт шкежат мурым возем. 4-ше курсышто тунеммем годым Шкетан лӱмеш театрын 95 ияш юбилейжылан пӧлеклалтше концертыште икымше гана «Арина» псевдоним дене лектынам. Н.Арбанын «Кенеж йӱд» мурыжым муренам. Мурылан у аранжировкым Андрей Сергеевич ыштен. Тошто марий калык муро-влак чонемлан лишыл улыт. Кызыт эстраде аланыште  шке лӱмем денак мурем. Шукерте огыл у мурем лектын. Семым шке возенам, а мутшо Зоя Висвисын, муро «Пеленет» маналтеш. Авторын почеламутшым  ужмеке, сем вигак ушышко тольо. Умбакыжат у муро-влакым возаш шонем», — ойла Марина.
Маринан йоча годсо шонымашыже шукталтын манын кертына. Тудо артист да мурызо.

-  Марий эстрадыште йӧратыме мурызыжо – Зоя Берникова, руш мурызо коклаште – Ани Лорак, Полина Гагарина.
-  Классикым колышташ йӧрата, поснак – оперым. Опер мурызо-влак кокла гыч тудлан Анна  Нетребко келша.

-Яра жапыште книгам лудеш, утларакшым – вес элласе литературым. Пелашыже Дмитрий Воронцов Константинов лӱмеш руш драме театрыште пашам ышта. Кумшо курс деч вара сӱаным ыштеныт.
-  Мирослава ӱдырышт кушкеш. Тудынат творческий шӱлышыжӧ шижалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: