"Рубрик деч посна", 2018 ий, Сорла тылзын 3-шо кечыже

Башньыште – оҥай выставке

Статьян авторжо Анастасия Эманова

1 августышто Йошкар-Оласе «Благовещенский башне» культур да выставке рӱдерыште «Геометрия городских улиц» выставке почылтын. Тушто ПГТУ-што икымше курсышто архитекторлан тунемше студент-влакын пашашт ончыкталтеш. 

IMG20180801150856Сӱрет-влак ныл темылан: «От царской свечи до лампочки Ильича», «Грандиозность и величие сталинского классицизма», «Новый взгляд на архитектуру эпохи Хрущева» да «Пешком по новому городу» — шелалтыныт.

Кажныштыже ӱдыр-рвезе-влак Йошкар-Олан моторлыкшым, архитектур поянлыкшым ончыктеныт.

Каласыман «Благовещенский башне» рӱдер Т.Евсеев лӱмеш Национальный тоштерын филиалжылан шотлалтеш. Выставкым почмашке ты тоштер директорын алмаштышыже Лидия Никаноровна Смирнова толын. Тудо ойла: «Ты выставке шкешотан, тӱҥжӧ – тудо самырык-влаклан келыштаралтше. Выставке сентябрь кыдал марте пашам ышта. Кумылан чыла еҥ рӱдерыш толын, экспозиций нерген шонымашыжым возен коден кертеш. А ме ты выставкым иктешлыме семын эн сай паша-влакын авторыштлан пӧлекым кучыктена».

Волгатехысе зданийым проектирований кафедрын доцентше Светлана Викторовна Гудкова ты кугу мероприятийыш толде кертын огыл. «Кажне олан архитектуржо ойыртемалтеш. Зданий-влакым ончен, могай кугыжан вуйлатыме жапыште нуным чоҥымым умылаш лиеш. Выставкыште тиде раш палдырна. Чын архитектор национальный культурын историйжым палышаш. Тудо кызытсе саманлан келшыше компьютер программым веле огыл кучылт моштышаш, тыгак сӱретлен, йырым-йырысе моторлыкым ужын моштышаш. Тиде профессионал семын кушкаш полша», — манеш С.Гудкова.

Россий архитектор ушемын Марий пӧлкажын председательже Владимир Евгеньевич Бородов специалист семын ты выставкылан акым пуэн. Тиде ончер оҥай манын ойлен. Идалыкыште студент-влак молан да кузе тунемын шумыштым выставкыште ужаш лиеш.  Тиде ӱдыр-рвезе-влакланат, нуным туныктышо-шамычланат – шкешотан иктешлымаш, — ойлен В.Бородов.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: