"Кузе илет, ялем?" рубрик, 2018 ий, Сорла тылзын 10-шо кечыже

«Васлий, тыйын мӱет молын деч шерырак!..»

Статьян авторжо Ирина Ямбаршева

пч02Медведево район Яшнур ялыште 1955 ий 1 сентябрьыште шочшо Василий Гаврилович Глазунов мӱкш ончышо лияш изинекак шонен. Но мӧҥгыштыжӧ мӱкшым ончен огытыл, садлан ты пашалан тунемаш кӱлын. Пчеловодлан кушто туныктымым пален огыл. Сандене Ошӱрга кыдалаш школ деч вара Йошкар-Оласе 9-ше номеран профтехучилищыш столяр-плотниклан тунемаш пурен. Специальностьым налмек, направлений дене кок ий стройкышто плотниклан ыштен. Но мӱкшым ончымо нерген монден огыл. Семёновка селасе 1-ше номеран СПТУ-што тидлан туныктат манмым колмеке, тунамак тушко тунемаш пурен. Училищыште тунеммеке да шошым практикым эртымеке, Василийым да тудын дене пырля тунемше Зинаида лӱман ӱдырым Курыкмарий район Дубовский села воктенысе «Сила» совхозын мӱкш отарышкыже пашашке колтеныт. Зинаида Лихачева тиде кундемысе Йӱксар ялыште шочын. Тыште нуно коктын лишкырак палыме лийыт, ваш-ваш йӧратен шындат, сӱаным ыштат. Икмыняр жап гыч нуным Йошкар-Ола воктенысе «Овощевод» совхозыш ӱжыныт. Тыге Василий ден пелашыже Советский район Солнечный посёлко кундемыште мӱкш отарым вераҥдат, варажым Старожильск деч тораштак огыл чодыраште, Кугу Какшан эҥер серыште, ты совхозынак мӱкш отаржым угыч ышташ, кумдаҥдаш тӱҥалыт. Тыштак кардонышто, лӱмынак ыштыме пӧртыштӧ, куд ий илат.

IMG_0957Кызыт Василий шочмо ялыштыже ила. Кум эрге кокла гыч шкетын тале мӱкшызӧ, пелашыже — тудын кугу полышкалышыже. Кок шешкышт, Рая ден Ольга, пчеловодлан тунем лектыныт, мӱкшызӧ династийым умбакыже шуят, ача-ава лийшыштлан полшат, изирак Саша эргат мӱкшым пеш йӧрата. 16 ияш Андрей ден 8 ияш Максим уныкашт мӱкш ончымашке чоныштым пыштат.

Тылеч посна Василий ден Зинаида тале садовод улыт. Пакчаштышт 20 наре тӱрлӧ сорт олмапу, 15 тӱрлӧ сорт грушо, шуко сорт виноград, тӱрлӧ сорт эҥыжвондо да кумда теплице улыт. Мотор пеледыш-влакланат вер сита. Эше оҥайже: пакча тӱрыштӧ 4 метрат пеле диаметран 400 ияш шоҥго тумо шога. Тудын пел могыржо кошкен гынат, вес могыржо илыше. Василийын ачаже, Кугу Отечественный сарын 94 ияш участникше да инвалидше, Гаврил Васильевичат патыр тумо гаяк.

Икманаш, Яшнурын эргыже В.Г.Глазунов изи огыл ешыж дене пырля ий еда кокла шот дене ик тоннат пеле мӱйым пазарыш луктын ужалыдеак налше-влакым муэш. Еҥ-влак тышке тиде шере кочкышым шке толын налыт да ятырынже тыге пелештат: «Васлий, тыйын мӱет молын дечын шерырак».

Иван РЕчКИН.

Авторын фотожо.

IMG_0951IMG_0988IMG_1094IMG_0993

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: