"Рубрик деч посна", 2018 ий, Сорла тылзын 3-шо кечыже

Изи годсек ВДВ-ште служитлаш шонен

Статьян авторжо Елена Годунова

lbMlfPkZbx4ВДВ-ын шочмо кечыжлан 1930 ий 2 августым шотлат. А Юж войскаште служитлыше десантник-влакын икымше боевой опытышт 1939 ийыште лийын. Халхин-Гол эҥер воктене 212-шо юж десант бригаде япон-влак ваштареш кредалын. Вара – Финляндий дене вашпижмаш, Кугу Отечественный сар. Тыгак ВДВ Афганистаныште, Чечняште, Карабахыште, Йӱдвел да Эрвел Осетийыште, Приднестровьеште да моло вереат геройлыкшым ончыктен. Ӱмаште Йошкар-Оласе Сеҥымаш бульварыште Россий Герой, подполковник Марк Евтюхиным шарныме лӱмеш бюстым почмо. М.Евтюхиным шарныме оҥам Йошкар-Оласе Гагарин проспектысе ик пöрт пырдыжыш вераҥдыме. Ты пöртыштö тудо изиж годым илен. Тыгак геройын лӱмжым Североморск оласе ик школлан пуымо. М.Евтюхинын да тудын десантникше-влакын подвигыштым Чечняште лийше боевой командир-влак нигунамат огыт мондо.

Кызыт ВДВ радамыште ятыр тӱжем салтак служитла. Мемнан кундем гычат шагал огыл рвезе ты войскаште лиймыж дене кугешна. Нунын кокла гыч иктыже – Шкетан лӱмеш Марий драмтеатрын артистше Игорь Антропов.

Игорь Шернур посёлкышто шочын-кушкын. Тысе 2-шо номеран школым тунем пытарыме деч вара Йошкар-Оласе строительный техникумыш юристлан тунемаш пурен. Тыгодымак самырык-влаклан «ГРОМ» десантник школыш коштын. Тунам да кызытат ты школым М.Фаткуллин вуйлата. Игорь изиж годсек ВДВ-ыште служитлаш шонен. Тидын нерген тыгерак каласкалыш:

- Ачам Антропов Виталий Анатольевич юж войскаште служитлен. Шарнем, мыйым изимак десантник-влакын пайремышкышт пырля коштыкта ыле. Сандене кушкын шумеке, армийыш каяш да ВДВ-ыште служитлаш эн кугу шонымашем лийын. Ачамат мыланем тидымак ойлен. Школ деч вара олаште строительный техникумышто юристлан тунемынам. Тунамак самырык-влаклан десантник школыш возалтынам. Тушто самырык боец-влакын курсыштышт шкемым шуаренам. Ты курсышто марш-бросокым куржталме, парашютым погаш тунемме, АН-2 самолет гыч парашют дене тöрштылмö. Тыге мый шкемым ВДВ войскаште служитлаш ямдыленам. Шонымо семынак тушко служитлаш логалынам.

2009 ий 2 ноябрьыште ВДВ-ын учебный центрыштыже служитлаш тӱҥалынам (ВДВ-ын тыгай рӱдерже тӱняште икте веле). Пел ий лиймеке, 76-шо Псковский дивизийысе 104-ше десантно-штурмовой полкын десантно-штурмовой ротыштыжо служитлаш тӱҥалынам. Тудо Псков областьысе Черёха посёлкышто верланен. Армийыште лиймем годым парашют дене шым гана тöрштенам. Кум гана – АН-2 самолёт гыч, ныл гана – ИЛ-76.

ВДВ элыштына ик эн элитный войскалан шотлалтеш. Сандене тушто службым эртыше еҥ дене кугешныдежат огеш лий, очыни. А тушто служитлаш изинекак шонышо, шкеныштым тидлан ямдылыше еҥ-влак кок пачаш пагалымашым сулат. Теҥгече элна мучко десантник-влак шке пайремыштым пайремленыт. Йошкар-Олаште да райрӱдылаште десантник-влак иквереш погыненыт И.Антропов ты кечым моло десантник-влак семынак чон вургыж вучен. А пайремым кузе эртарымышт нерген тыгерак каласкалыш:

- Марий Эл гыч лу наре еҥ пырля службым эртенна. Кажнышт дене кылым кучена. Ты кечын пырля служитлыше йолташем-влак дене кажне ийын вашлийына. Ола мучко коштын савырнена, моло десантник-влакым саламлена. Вара гитарым шоктена, тудын почеш мурым мурена. Ты кечын йолташем-влак дене аракам огына йӱ, фонтаныште огына йӱштыл. Вет тыгай койыш десантникын лӱмнержым ӱлыкö волта. Садлан шкем кучен моштыман, самырык тукымлан пример лийман.

Армийыште тӱрлыжат лиеда. Южгунам чыташ лийдыме нелылык чоным авалта. Тидыже мемнам, рвезе-влакым, лӱддымö, патыр лияш туныкта.   Службо эртыме жапым кызыт порын шарналтем. Лиеш ыле гын, тиде войскаште эше ик гана службым эртем ыле.

Армийыште лийме кажне рвезын чоныштыжо келге кышам кода, очыни. Вет нуно, чынжымак, тушто шукылан тунемыт. Тек элнан Вооруженный вийже эреак куатле, пеҥгыде лиеш, а тӱнямбалне тыныслык озалана!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: