"Олимп" рубрик, 2018 ий, Сорла тылзын 10-шо кечыже

Йолжо писе, кидше виян

Статьян авторжо Анастасия Эманова

11 августышто Российыште Физкультурникын кечыже палемдалтеш. Ты пайрем 1939 ий годсек ик эн кугулан шотлалтеш. Ончыч тудо «Таза капыште – таза чон!» лозунг дене эртен. Спортлан элыштына кугу вер ойыралтеш. Кажне ийын манме гаяк у стадионым чоҥат, йоча-влаклан, кугыеҥ-шамычлан спорт секцийым почыт. Физкультурникын кечыже кажне тренерлан, спортсменлан вучымо пайрем. Марий Эл шуко тале спортсменже дене кугешна. Кажныж нерген каласкалыме шуэш. Тачысе номерыштына самырык марий баскетболистке Ангелина Волкова дене палдарена.

ангелинаКужэҥер посёлкышто илыше да тысе 2-шо №ан школышто тунемше ӱдыр тений 9-ше классыш вончен. Ангелина шукертак спортлан шӱман.

- Ангелина, молан спортым ойырен налынат, а, мутлан, куштымашым огыл?

- Спорт — илышем. Вес семынже лийынжат огеш керт ыле докан. Мый спортым йӧратыше ешыште кушкам. Авам шке жапыштыже куштылго атлетике да волейбол дене заниматлен, а ачам – борьба дене. Тимур шольым – каратист, республикысе таҥасымаш-влакын призёрышт.

6-шо классыште тунемме годым волейбол секцийыш коштынам, а вара баскетболлан кумылаҥынам. Спортын ты видше утларак келша. Баскетбол – мече дене эн мотор модыш. Тыште технике, писылык, мечым кышкымаш, дриблинг (мече дене манёвр) – чылажат оҥай. Баскетбол кумылем нӧлта. Спортын моло видше дене заниматлыме годым тыгай шижмаш мыйын ок лек. Мый вет эше куржталам. Куштылго атлетике дене районысо таҥасымашлаште эреак икымше лияш тыршем. Кӱчык дистанцийыште куржталаш утларак йӧратем.

 - Шуко турнирыште участвоватленат, ончылнет эше конкурс-влак вучат. Шарнымашеш кодшо иктаж таҥасымаш нерген ойло.  

- Тений командына школышто тунемше-влакын «КЭС-БАСКЕТ» Российысе таҥасымашын республикысе этапыштыже финалыште модын. Тушто мый мастарлык конкурсышто вием тергенам. Тушто кажне командыште эн шуко очком погышо спортсмен-влак участвоватлат. Ме штрафной да кум очком налме линийла гыч мечым кышкенна, баскетболистын стойкысо техникым палымынам ончыктенна. Чыла тидым писын да сайын ышташ кӱлын. Тиде мастарлык конкурсышто мый кокымшо верым налынам.

Баскетбол дене тренерем Виталий Леонидович Терешин ден физкультурым туныктышо Сергей Васильевич Александровлан кугу таум ойлынем. Спортлан шӱмаҥден, кугу кӱкшытыш шуаш кумылаҥден шогат, шукылан туныктат.

 - Тений кугу экраныште бакскетбол дене СССР-ын сборный командыже, олимпийский чемпион-влак нерген «Движение вверх» фильмым ончыктеныт. Ангелина, тый тудым онченат? Фильм чоныштет могай шижмашым коден?

- «Движение вверх»  — виян фильм. Тудо чоныштем келге кышам коден. Фильм кажне айдемым илышыштыже кеч-могай чарак дене тӱкна гынат, тудым сеҥен, цельышке шауш, тыгак патриотизмлан туныкта. Шке вийлан, командылан, тренерлан ӱшанаш кӱлеш.   

 - Выпускной классыш вонченат. Ончыкшым кушко тунемаш каяш шонет?

- Але каласен ом керт. Чылажат ончылно.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: