"Шинчымаш кугорнышто" рубрик, 2018 ий, Сорла тылзын 31-ше кечыже

Йоча-влак чонжым рӱпшат

Статьян авторжо Анастасия Эманова

Шуко самырык еҥ, дипломым налмеке, шке специальностьышт дене пашам огеш ыште, поснак туныктышо-влак нерген тыге ойлаш лиеш. Амалже эре иктак: пашадар изи. Ответственностят пеш кугу. Вет туныктышо икшывылан кокымшо ава але ача гаяк лийшаш, сай образованийым пуышаш, воспитанийыштат изи огыл рольым модшаш. Самырык ӱдыр Аня Васильевам тидыже лӱдыктен огыл. Тений тудо Марий кугыжаныш университетым йошкар диплом дене тунем пытарен да Медведево район У Арбан школыш тӱҥалтыш класслам туныктышылан пашаш пурен. Шукерте гына огыл студентке Аня ынде йоча ден коллегызе-влаклан Анна Васильевна.

васильеваА.Васильева Йошкар-Олаште шочын-кушкын. 10-шо №-ан кыдалаш школышто тунемын. Изинек чолга кушкын, тӱрлӧ мероприятийыште участвоватлен. Школышто тунемме годым ӱдыр экономист, кугыжаныш служащий лиям манын шонен. Но кугурак класслаште шонымашыже вашталтын. Туныктышо паша чонжылан келшен шинчын. Да школ деч вара МарГУ-ш Калык культур да тӱвыра кокласе кыл институтыш марий йылме ден литературым, тыгак финн йылмым туныктышылан да Ешартыш образований институтышто тӱҥалтыш класслам туныктышо специальностьлан тунемаш пурен. «Студент пагыт мондалтдыме. Мый шуко мероприятийыште участвоватленам, чылажым омат шарне. 2016 ийыште Финляндийысе Туркушто финн йылме дене кеҥеж курсышто тунемынам. Волонтёр пашамат шуктенам. Проектым возымаште вием тергенам да тудым аралаш Самара областьыште эртаралтше «IВолга» форумыш миенам ыле. Университетыште научно-практический конференцийлаште тӱлӧ темылан докладым лудынам. Марий самырыктукым слетыш миенам. Тыгак самырык этножурналист школын участникше лийынам. 2015-2016 ийлаште йылме-влак тӱнямбал фестиваль годым  И.Н.Ульянов лӱмеш Чуваш кугыжаныш университетыште кумылан чыла еҥлан пырля тунемше ӱдыр Вероника Мустаева дене марий йылмым туныктенна.  2017-2018 ийыште МарГУ-што кумылан-влаклан финн йылме курсым эртаренам. Тыгай мероприятийлаште шкем ончыктен, шукылан тунемаш лиеш – эн ончыч калык ончылно шкем чын кучаш, шке вийлан ӱшанаш. А туныктышо поснак коммуникативный лийын моштышаш. Изи пашадар мыйымат тургыжландара. Но тиде кумылем волтен огыл. Ончыкшым сай могырыш вашталтеш манын шонем. Мый йоча-влакым йӧратем, нунын дене пашам ышташ мылам – куан да пиал. Кызыт туныктышо-влак 1 сентябрьлан чот ямдылалтына. Мый У Арбан школышто 1-ше «Б» класслан вуйын шогем. Изи йоча-влак дене пашам ышташ оҥай, тыгодым моткоч неле. Но мый шке виемлан ӱшанем да чыла сай лиеш манын шонем», — ойла Аня.

Ме самырык туныктышым да тудын коллегыже-влакым уло кумылын Шушаш шинчымаш кече дене саламлена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: