"Кугарнягудо" рубрик, 2018 ий, Сорла тылзын 17-ше кечыже

Кован ӱштыжым арала

Статьян авторжо Анастасия Эманова

Калыкыште ойлат: «Шочмо сурт гыч лектын каяш корно кӱчык, савырнен толаш пеш кужу». Киров кундем Малмыж район Кугу Кетек селаште шочын-кушшо Лидия Васильевна Дресвянникова Тольяттиште 35 ий ешыж дене илен да пашам ыштен. Но чонжо тудым эре шочмо мландышкыже шупшын. Ынде пӧртылмыжлан ныл ий лиеш.   

DSC03208Лидия Васильевна дене 4 августышто Полтыш онлан вуйым савыме мероприятийыште палыме лийынна. Тудо мотор марий тувырым чиен лектын ыле. Л.Дресвянникова –  Российын почётан туныктышыжо, паша ветеран. Кандаш ий шочмо селасе школышто тӱҥалтыш класс-влакым туныктен, варажым – Тольятти оласе ик школышто. «Кайыкланат шке пыжашыже шерге. Тора велыште илыме годым шочмо суртем, ялысе пӱртӱс мыйым пӧртылаш ӱжын. Кажне кеҥежым мӧҥгӧ толынам. Икшывем-влак кушкыныт, кажныжын – шке ешыже. Эргым Тольяттиште ила, ӱдырем – Набережный Челна олаште, — ойла Лидия Васильевна. – Мый куд шочшан ешыште кушкынам. Кугуракше мый улам. Юмылан тау, шольым ден шӱжарем-влак чылан илат, таза улыт. Мемнам изина годым тынеш пуртеныт, но ме чонна дене чимарий улына. Отыш кумалаш коштына, пӱртӱсын вийжылан ӱшанена. Кугу Кетек селаште чын марий-влак Изергин, Тойгулов да Илибаева фамилиян улыт. Мыйын ӱдыр фамилием – Изергина. Чаманен каласыман, кундемыштына самырык еҥ-влак марла шагал мутланат. Мый шкежат 35 ий олаште иленам да йылмым изиш монденам манын кертам. Но тыршем марла арун кутыраш. Тӱрлӧ пайремыш марий тувырым кугешнен чием. Тудым мыланем шӱжарем-влак пӧлекленыт. Вуйышкем шыҥашовычым пидам. Тидыже марлан кайыме улмем ончыкта. Изиэм годым ӱпем сӧса дене пуненам. Сӧса – шкешотан кандыра. Тудын мучаштыже тыгыде оксам пижыктыме. Кугезе коча-кована-влак тыгыде окса осал деч арала манын ӱшаненыт. Школыш кайымешке, йыдалым пидын коштынам. Йыдалым кочам Павел Изергиевич, селаште тудым Изергын Павыл маныныт, шкеак керыштын. Тудын ватыже, мыйын ковам Пелагея Пайкеевна, шудо нерген шуко пален. Ончыч йоча-влак кугыеҥ семынак пашам чот ыштеныт. Ӱдыръеҥланат нелым шуко нумалаш логалын. А вет тиде сай огыл, ӱдыр ончыкылык ава лийшаш. Ковам, мончаш пурымо годым шун кӧршӧкыштӧ тӱрлӧ шудым тӱен, рок дене луген, ты вартыш дене мӱшкыремым йыген. Ковам кидпашалан уста лийын. Тӱрлен, пидын. Куэн моштен. Теве авалан куымо ӱштыжым ынде мый йӧратен ӱшталам».

Лидия Васильевна шукертак пенсийыш лектын. Яра жапыштыже книгам лудеш, мураш йӧрата, пошкудыжо-влак дене погынен, ожнысо илышыштым пырля шарналтат.

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: