"Сылнылык тӱня" рубрик, 2018 ий, Сорла тылзын 24-ше кечыже

Курчак театр у тургымым почын

Статьян авторжо Анастасия Эманова

17 августышто Йошкар-Оласе Курчак театрыште пресс-конференций лийын.

IMG_4714Художественный вуйлатыше А.Ямаев  77-ше театр тургымышто могай у спектакль ончыкталтме нерген каласкален: «1 сентябрьыште Г.Х.Андерсенын йомакше негызеш шындыме «Снежная Королева» спектакль ончыкталтеш. Тудым Екатеринбург ола гыч режиссер Е.Сивко шынден. Вес премьер 6 декабрьыште лиеш. «Йӱд орол» постановко йоча-влаклан веле огыл, ача-ава-шамычланат оҥай лиеш. Спектакльым марий фольклор негызеш шындыме. Тушто Овда, Вӱдия да моло йомакысе герой-влак лийыт. Режиссер-постановщик мый улам, художник-сценограф – Сергей Таныгин, композитор – Григорий Архипов. Спектакль моло курчак постановко деч ойыртемалтеш. Шуко куштымаш, пластике, маске лийыт. Технический могырымат спектакль неле. Терменвокс, глюкофон, электрокӱсле семӱзгар-влак кучылталтыт.   

А 20 декабрьыште театрын коллективше «Сказка о рыбаке и рыбке» спектакль-шонкалымашым ончаш темла. 

Нине кум спектакльым Единый Россий партийын «Театры – детям» проектше почеш грант окса дене шындыме. Ты оксам театрын материально-технический базыжым уэмдаш, тыгак кызытсе саманлан келшыше оборудованиян йӱкым возымо студийым ышташ кучылтына.

Тений Курчак театрыш ныл самырык артистым пашаш налынна. Ик артистше, Александр Журкин, Димитровград ола гыч толын. Нуным тений ноябрьыште «Впервые на манеже» спектакль-концертыште ужаш лиеш.

Шыжым театр «Вечера на Патриаршей» проект почеш еш дене ончаш келшыше спектакльым темла. Тыгай спектакль радамыш «Жак и его слуга, или Как стать людоедом», «Счастливого пути», «Поверьте в бабочек», «Маленькая фея» постановко-влак пурат».

IMG_4785Маркетинг да рекламе шотышто специалист И.Тимонина гастроль да фестиваль-влак нерген ойлен: «19 гыч 23 сентябрь марте Киров олаште Курчак театр-влакын «Вятка – город детства» фестивальышт лиеш. Тушто ме «Цветик-семицветик» спектакльым ончыктена. «Марий Эллан 100 ий темме вашеш» проект почеш ноябрьыште гастроль дене Удмуртийыш каена. Тыодым удмурт артист-влак мемнан деке толыт. Молгунамсе семынак «Бальшие гастроли для детей и молодежи» федеральный проектыште участвоватлена. Да тургым мучко гастроль дене тӱрлӧ олаш лекшаш улына. Кызыт Дагестан Республикыште спектакльым ончыктымо шотышто мутланена».

Пресс-конференций деч вара кугыеҥ-шамычлан «Панночка» спектакльым ончыктышт. Постановкын премьерже 2015 ийыште лийын. Но тӱҥ рольым Хома Брутым модшо А. Сильвестровын колымыжлан кӧра спектакльым кум тургым ончыкталтын огыл. Кызыт тиде рольым самырык артист Д.Гребнев модеш. 21 сентябрьыште Александр Сильвестровым шарныме лӱмеш «Панночкам» ончыктат. Тушто погымо окса артистлан памятникым шындыме пашалан пуалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: