"Улам мый Рве-зы-лык!" рубрик, 2018 ий, Сорла тылзын 24-ше кечыже

Марий кундем проектыш логалын

Статьян авторжо Анастасия Эманова

18 августышто Йошкар-Оласе историй тоштерыште «Маршруты России» молодежный этнотуристический экспедицийын участникше-влак дене вашлиймаш лийын.

20180818_104022«Маршруты России» — самырык тукым паша шотышто федеральный агентствын проектше. Калуга, Саранск, Екатеринбург да моло гыч 30 утла самырык блогер ты эскпедицийыш ушненыт. Нуно Российысе тӱрлӧ олаште лийыныт, кундемын национальный тӱсшым шымленыт да интернетыште шке блогыштышт тидын дене палдареныт. Бурятий Республикын рӱдӧ олаже Улан-Удэ гыч толшо участник Виктор Бадеев экспедицийыш ушнымыжлан моткоч йывыртен. Тудо ойла: «Тыгай проект пеш кӱлешан, шонем.  Шуко уым да оҥайым пален налаш лиеш. Вет кажне ола, кундем шкешотан. Кажныжын – шке историйже, шке национальный тӱсшӧ. Российыште тӱрлӧ калык-влак илат. Ме чылаж нерген огына пале. Тиде экспедиций элын национальный колоритшым ончыкташ шонымаш дене эртаралтеш. Экспедицийын  икымше этапше июнь гыч тӱҥалын июль кыдал марте Эрвел Сибирьыште эртаралтын. Участник-влак Забайкальский крайыште, Иркутск кундемыште, Бурятий Республикыште лийыныт. Мый тунам блогер-влакым вашлийынам ыле. А варажым шкежат экспедицийыш ушненам. Этнотуристический экспедицийын кокымшо этапше Юл кундем федеральный округышто эрта. Ме Башкортостаныште, Татарстаныште, Удмуртийыште лийынна. Марий Элым да пытартышлан Чувашийыш каена. Тоштерлаш, тӱвыра рӱдерлаш, национальный парклаш миен коштынна, кажне кундемыште национальный кухньым тамлен онченна, мер организаций-влакын самырык вийже дене вашлийынна».

Участник-влаклан олан историй тоштержын пашаеҥже-шамыч Йошкар-Олан набережныйжым, паркше-влакым ончыктеныт, Козьмодемьянск олаш кава йымалсе тоштерыш намиен коштыктеныт. Кундемна шуко ару ер, памаш, чодыра дене палыме манын ойленыт. Кужэҥер районышто марий Швейцарийыш логалаш лиеш каласеныт.

Тиде экспедицийын пайдаже лиеш, блогер-влакын интернетысе лаштыкыштым ончен, шуко турист Марий Элыш толаш кумылаҥеш, шонена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: