"Шинчымаш кугорнышто" рубрик, 2018 ий, Сорла тылзын 3-шо кечыже

Пашашке уло чонжым пышта

Статьян авторжо Ирина Ямбаршева

Тений «Марий йылмым эн сайын туныктышо» конкурсышто лу туныктышо участвоватлен. Лариса Геннадьевна Иванова тушто лауреат лӱмым сулен. Тудо Медведево район Руэм кыдалаш школышто кокымшо ий пашам ышта. Чолга, творческий шӱлышан ӱдырамаш уло чон шокшыжым пашашкыже пышта. Марий газет-влакым, поснак «Кугарням», лудаш йӧрата да эреак подпискым ышта.

ЛарисаМарий Турек районын шочшыжо кандаш классым Марий Купто кыдалаш школышто тунемын. Вара ешыже Звенигово олаш илаш куснен да тушто 9-ше ден 10-шо класслам тунем пытарен.

Туныктышо профессий эре чап пашалан шотлалтын. Туныктышым пагалат, мутшым колыштыт. Тудо йоча-влаклан веле огыл, ача-ава-шамычланат авторитет лийын. Тыгодым туныктышо лияш – кугу ответственность. Икшывым шке веке савырен моштыман, шинчымашым налаш кумылжым лукман. Лариса Геннадьевна тидым умылен да школ деч вара Н.К.Крупская лӱмеш Марий пединститутыш тӱҥалтыш класслам туныктышо специальностьлан тунемаш пурен.

«Авам-ачамат туныктышо улыт. Ачам Марий Купто школышто завуч да директор лийын, варажым Звенигово РОНО-што ыштен, авам Марий Купто школ-интернатыште, Звенигово школ-интернатыште воспитательлан ыштен. Кызыт коктынат сулен налме канышыште улыт.

Звенигово район Суслоҥгер школышто марий кугыжаныш йылмым ятыр ий туныктенам. 2012 ийыште икымше гана «Идалыкысе туныктышо» конкурсышто участвоватленам. Но тунам финалыш логалын омыл. Тений лауреат лиймемлан моткоч йывыртенам. 26 ий туныктымо жапыште опытым погенам, шонем. Шкемын туныктышем-влакым шарналтем. Нунын мастарлыкыштым ончен, тиде профессийлан кумылаҥынам. Ты конкурс – шкешотан иктешлымаш. Руэм кыдалаш школышто тӱҥалтыш класслам туныктем да 2-шо классыш коштшо ӱдыр-рвезе-влаклан марий йылме урокым эртарем. Шукынжо марий улыт, но, чаманен каласыман, шочмо йылмышт дене сайынжак огыт мутлане. Урокышто тыршат, мӧҥгысӧ пашамат сайын ыштат», — манеш туныктышо.

Анастасия ЭМАНОВА.

Фото — еш альбом гыч.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: