"Рубрик деч посна", 2018 ий, Сорла тылзын 3-шо кечыже

Пушкыдо модыш – моткоч сай пöлек

Статьян авторжо Елена Годунова

ТаняГаляут.Кызытсе саманыште кевытыште мом шонет, тудым налаш лиеш. Йоча-влакланат могай гына модышым огыт ужале. Туге гынат шке кид дене ыштыме модыш кумылым савыра, чоным куандара. Садлан ятыр ача-ава шке шочшыштлан заказ почеш модышым ыштыкташ йодыт. Тыгайже модыш пурен манам гын, йоҥылыш ом лий, шонем. Вет ятыр кидмастар соцсетьыш шке ыштыме пашаж нерген фотом вераҥда, тыге еҥ-влак ужыт да заказатлаш кумылаҥыт. Теве Йошкар-Ола гыч Татьяна Галяутдинова еҥ-влакын йодмышт почеш модышым пидеш. Шкеж нерген тыгерак ойла:

- Мый экономист улам, но чон йодмо пашам кумылын ыштымым шотыш налаш гын, шкемым творческий айдемылан шотлем. Пидаш моткоч йöратем. Ты сомылым ыштыде иленжат ом керт, очыни. Молан манаш гын яра жапем лектеш гын, вигак кидпашалан пижам. Тӱҥ шотышто крючок, спице дене пидам. Тыгак ургаш да тӱрлаш йöратем. Пидаш мый изинекак тунемынам. Ты сомыллан ковам туныктен. Изиракем годым хобби семын веле шоненам гын, кок ий ончыч тидлан эшеат чот кумылаҥынам. А амалже тыгайрак лийын: уремыште эртен кайымем годым 4-5 ияш ӱдырым ужынам. Тудо пушкыдо модышыжым изи кизаж дене тыге ныжылгын öндалын! Тидыже йоча годсо жапышкем ик татлан пöртылмö гай чучын. Вет изи годым кажне йочан шке йöратыме модышыжо лийын, мыйынат ыле. Вигак йоча-влаклан модышым пидаш тӱҥалаш кумыл лектын. Нунылан куаным ыштымаш – илышыште эн кугу пиал! Тыге мый модыш-влакым пидаш тӱҥалынам. Йодмо почеш кугыеҥ-влакланат ыштем. Кажне еҥын йодмашыже, тӱсшö да кумылжо тӱрлö. Садлан модышат йодшо еҥлан келшыше лийшаш. Заказчик-влакын кумылышт мыланем моткоч шерге. Нунылан келша гын, шке моштымашемым модышыш уло чон дене пышташ тыршем. Теве, мутлан, Валентин лӱман шӱман мераҥ йöратыме еҥын кумылжым нöлташ полша. А именной модышым пöлек шотеш ыштеда гын, лишыл еҥдан кумылжым вигак савыреда. Модышлан лӱмын плюшевый шӱртым налам. Тудым Турций гыч заказатлем. Тыгай шӱртö пыл гай пушкыдо, гипеаллергенныйлан шотлалтеш. Йоча-влаклан лач келшен толеш. Садлан тыгай шӱртö дене пидмем чон каныш семын чучеш. Ты шӱртö дене эше пледым пидам. Модышем-влакым «Няшки-Обнимашки» манам. Нуно моткоч пушкыдо, ныжылге улыт, южгунамже кид гычат колтымо ок шу. Ик модышым пидаш кум але утларак кече кая. Тидыже модышын кугытшым, лопкытшым шотыш налын ышталтеш. Кажне модышлан схемым шкеак ямдылем. Тудо мотор да чапле лийже манын, кажне детальым шымлен ышташ тыршем. Южгунам вич-шым гана тöрлаш логалеш. Туге гынат кажне модышыш шке моштымашемым, кумылемым пышташ тыршем, тыге озажлан поро, весела кумылем пуэм. Кажне модышын — шке ойыртемже, койышыжо, кумылжо, пӱрымашыже. Садлан иктаж модышын копийжым шочыкташ огешат лий.

GeoqGZn7woY

Кидмастар-влакын мотор, чапле пашаштым ужатат, кузе вара нунын чоным, моштымашым, кумылым пыштен ыштымыштлан от ӱшане? Вет йöратыме сомылым чон почын ыштет гын, тудын саскажат куандара. Тыгак эше нунын нерген тыге ойлымо шуэш: «Усталык уло гын, паша деч посна от код». Тидын дене теве мом ойлынем, тыгай еҥ-влак паша деч посна кодыт гынат, шужен шинчаш огыт тӱҥал. Кинде ден ӱйлан садак оксам ыштен налыт.

aOfM8bXHLsU

7uIkaKVrYxA

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: