"Сылнылык тӱня" рубрик, 2018 ий, Сорла тылзын 24-ше кечыже

Тунеммаште тудлан вий-куат

Статьян авторжо Анастасия Эманова

Илыш кузе савыралеш иктат ок пале. Таче тыште илет, йӧратыме пашам ыштет, а вес кечын трукышто чыла вашталт кертеш. Узбекистан гыч толшо ӱдыр Дарьяна Пак Йошкар-Олаш логалеш, тыште тунемаш тӱналеш манын шоненжат огыл. Тудо МарГУ-со физике да метематике факультетын студенткыже. Тений кумшо курсыш вончен.

HNFlI-0JcNc- Дарьяна, национальность дене кӧ улат?

- Мый Ташкент олаште шочын-кушкынам. Ачам – кореец, а авам – немке. Ешыште рушла мутланена. Англичан йылмым умылем, немычла удан огыл мутланен моштем, а корей йылмым ом пале.

- Чыла вуз кокла гыч молан лачак МарГУ-м ойырен налынат?

- Тыге пӱралтын, очыни. Мый шкенан дене республиканский эстрадно-цирковой колледжым вокал направлений дене тунем пытаренам. Колледж деч вара вузыш каяш шоненам. Ташкентыште МГУ-н филиалже уло. Тушко психологий специальностьлан тунемаш пураш шоненам. Экзаменым кучаш кӱлмӧ предметшат куштылгыла чучын. Но пурен кертын омыл. Да подготовительный курсыш кошташ тӱҥалынам. Психологий деч посна прикладной математикым тунемынам. Ты предмет мылам чот келшен. Программист специальностьлан тунемаш шонен пыштенам. А МарГУ-ш мый вучыдымын логалынам. Ташкентыште Россотрудничество культур рӱдер уло. Ты организацийын еҥже-влак Узбекистаныште илыше ӱдыр-рвезе-влаклан Российысе вузлаш тунемаш пураш полшат. Мый кӱлеш экзаменым чыла сдатленам да Российысе ик оласе вузыш документем пуаш ямде лийынам ыле. Но культур рӱдерыш толмо кечын МарГУ-ш экзаменым кучымо нерген пален налынам. Тунам ала-молан ты университет Москошто верланен шоненам. Мый вучыдымын-шиждымын маншаш, экзаменым кучышым да мӧҥгӧ кайышым. А ала-мыняр кече гыч электрон почтышкем Марий кугыжаныш университетыш бюджет верыш тунемаш пурен кертмем пален налынам. Ынде кумшо ий Йошкар-Олаште илем. Программист лияш ямдылалтам, но ты специальность дене пашам ышташ ом тӱҥал, шонем. Ончыкшым мом ыштем эше ом пале. Ала МарГУ деч вара эше иктаж-могай профессийлан тунемам. Мый йӧратем тунемаш.

- А молан шочмо республикысе вузыш пурен отыл?

- Узбекистанысе вузлаш тунемаш пураш моткоч неле. Абитуриент-влак пеш шукын улыт, садлан чылалан бюджетыште веле огыл, тӱлыман верышкат вер ок сите. Тидлан кӧра тунемаш пураш конкурс кугу.

ZyXme-2L8UE - Российысе образований системе тендан республикысе деч чот ойыртемалтеш, шонет?

- Да. Йоча-влак изинек пален кушкыт, кӱшыл образованийым,  шочмо элыште налнет гын, тыршен тунемман. Мемнан дене ЕГЭ-м огыт кучо. Абитуриент-влак единый тестированийым возат. Тестыште тӱрлӧ предмет дене кылдалтше йодыш-влак улыт. Нуным решатлен, чын вашмутын номержым чиялтен шындыман. Мемнам эсогыл  чын чиялташ туныктат. Молан манаш гын тестированийым туныктышо огыл, а компьютер терга. Садлан чыла раш лийшаш. Российыште чыла манме гаяк йоча вузыш тунемаш пурен кертеш манын шонем. Шекланенам, шуко йоча тунемаш ӧркана. Мыйын тунемме группыштак 50% студентым луктын колтеныт. А ӱдыр-рвезе-влак тидлан огытат ойгыро, нимат огыл, вес ийын угыч тунемаш пурем веле манын ойлат.

- Кок калыкын шочшыжо улат. Корей, немыч культур-влакым сайын палет?

- Ташкентыште тхэквондо дене федераций уло. Ончыч ачам ты федерацийын вице-президентше лийын. А авам мыйын ик йочасадыште воспитательлан ыштен. Тудо ты боевой искусство дене тренировкыш ачам деке коштын. Тыгак келшаш тӱҥалыныт. Но нуно шукертак ойырленыт. Туге гынат ачамын ешыж дене кылна сай. Мый шкежат йоча годым тхэквондо дене заниматленам. Чыным ойлаш гын, тренировкыш кумылын коштын омыл. Содыки спортлан огыл, а утларакшым творчествылан шӱман улам.

Ачам – Российын гражданинже. Тудын тукымжо Владивосток гыч. Корейыште мӱндыр родыжо-влак улыт, очыни. Но ме нуным огына пале. А авамын тукымжо – Юл кундем гыч.

Кореец-влакын Асянди пайремышт уло. Асянди – йочан икымше шочмо кечыже. Тиде пайрем ик эн тӱҥлан шотлалтеш. Йочам икымше шочмо кечыж дене саламлаш уло родо-тукымжо толеш. Асянди пайрем йӱла пеш оҥай. Ӱстембаке ончылгоч тӱрлым пыштат: рисым, книгам, йошкар фасольым, ручкам але карандашым, вашкӱзым, шӱртым, имым, кинжалым да оксам. Йоча келшыше предметым ойырен налшаш. Икшыве рисым але фасольым налеш гын, сайлан огыл, ончыкшым тудо нелын черланымым ончыкта. Книгам куча гын, шымлызе лиеш манын ӱшанат. Мый талукаш улмем годым ручкам, тетрадьым да книгам ойырен налынам. Садлан тунемаш йӧратем ала-мо.

 - Германийыште родыда уло? X1NIbpIPkA4

- Ковам Тюбинген олаште ила. Мый йоча годым туддеке уналыкеш миенам ыле. Коваем мый денем немычла мутлана. Тудак мыйым немыч культур дене шуко палдарен. Германийыште шыжым эртарыме Окторберфест фольклор фестиваль нерген шукынжо колыныт. А ончыч тудо шурным поген налме пайрем лийын. Немыч-влакын эн тӱҥ пайремыштлан Вайнахт (Рошто) шотлалтеш. Тудлан тылзе ончычак ямдылалташ тӱҥалыт. Рошто деч ончыч кажне рушарнян мӧҥгыштӧ сортам чӱктат. Йоча-влаклан коробкаш шере пӧлекым пыштат. Тыге ныл рушарнян ыштат. Мыланемат ковам коробкаш кампеткым, шоколадым оптен.

- Творчествылан шӱман улметым шуко конкурсышто ончыктенат?

- Мый сеҥалташ ом йӧрате, садлан муро конкурслаште ом участвоватле. МарГУ-што night-fest национальный культур фестивальыште ик ийын немыч культурым ончыктенам гын, тений – корей калыкын культуржым. Кок ганажат мероприятийыште калык мурым муренам.

Дарьяна яра жапшым пайдалын эртара. Книгам лудаш, сӱретлаш йӧрата, тошто калык мурым шымла. Немыч, корей фольклор-влак оҥай улыт докан. Кушко ӱдырым пӱрымаш мардеж ончыкшым савыралеш, палаш ок лий, но шке корныжым муэш манын ӱшанена.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: