"Кидмастар" рубрик, 2018 ий, Сорла тылзын 17-ше кечыже

Шун кидшол, алга сымыстарат

Статьян авторжо Анастасия Эманова

Чыланжак огыл тӱрлӧ шер, тасма дене моторлыкым шочыктен, пидын да урген моштат. Тидлан кид лывыргылык, сӱретчын шинчаончалтышыже кӱлыт, шонем. Тӱрлӧ ярмиҥгаште южо еҥын кидпашажым ончет да ӧрат: могай сылне, але вара шкеак тыгайым ышташ лиеш? Теве Йошкар-Олаште илыше Татьяна Ложкина полимерный шун денетӱрлым ненча, ӱдыр-влаклан сӧрастарыме ӱзгарым ышта.

q7EeiwDT3_E- Татьяна, тыгай шун дене пашам ышташ кунам кумылаҥында? Келшен мо икымше пашада?

- Мый 34 ияш улам. Злата ӱдыремлан – куд ий. Тудак мыйым творчествылан шӱмаҥден. Декрет отпускышто лиймем годым интернетыште полимерный шун дене ыштыме тортан кидшолым ужынам. Тунам ӱдыремлан ты материал дене кидшолым, ӱпыш заколкым ышташ кузе тунемаш манын шоненам. А такшым кидпашам ышташ изинек йӧратем. Ковам-влак пидаш, тӱрлаш туныктеныт, а авам – тувырым ургаш. Садлан творческий шӱлышан кушкынам манын ойлен кертам.

Термопластике дене икымше пашам ыштымем мыланем келшен огыл. Арам огыл калыкыште икымше мелна когаргыше лиеш маныт. Мый кидмастар-влакын пашаштым онченам, да кузе тыге моторын ышташ лиеш манын шоненам. А кызыт шкежат тидлан тунем шуынам.

EFLZ6TXg5g0 - Кидпашам тӱрлӧ техникыште ыштен моштеда. А могай техникылан эше тунемнеда ыле?

- Декоративно-прикладной искусствысо шуко техникыште пашам ыштен моштем. Поснак «кӱрышталтше тӱр» технике келша. Лаптыртен шарыме годым  шун пеҥгыде лийшаш. термопластике йӧным кучылтын, модышым ургаш моткоч чот тунемнем. Кумыл уло, жапым веле тидлан муман. Куандара: чон-кумыл пашам мылам оксам конда.

afH8EQP6zYE - А кушто кидпашалан материал-влакым налыда?

- Утларакшым интернет-кевытлаште налам. Китайысе AliExpressинтернет-гипермаркет келша. Тушто шуко тӱрлӧ шерым да фурнитурым муаш лиеш. Южгунам, кунам келшыше тӱсан шун вашке кӱлеш гын, Йошкар-Оласе «Дом книги» кевытыште налам. 

 - Йодмо почеш иктаж украшенийым ышташ кӱлеш, а тидлан кумылет уке. Творческий шӱлышан еҥлан тыгай годым кузе лийман?  

Kon5YROcE44 - Кумыл уке гын, пашам ышташ ом шич. Но жапыштыже йодмым шукташ манын, южгунам тыршыде ок лий. Кумыл да шун дене мом ышташ нерген шонымашат пашам ыштыме годым шочеш.

 - Российысе вес олала гыч йодыт мо? Кузе кидмастар улметым пален налыт?

- Шукыж годым заказчик-влак Йошкар-Ола гычак улыт. Вес эллаш эше лектын омыл, чылажат ончылно, а теве Российысе олалаш пашам-влакым йодмо почеш почто дене колтем. Пашам-влакым «Инстаграм» соцсетьысе лаштыкыште,  «Вконтакте» сетьыште «Украшения ручной работы из полимерной глины» группышто (https://vk.com/nushechka12) ужаш лиеш. «Yolka» ужалыме рӱдерыште, тыгак моло вереат кидпаша ярмиҥгалаште участвоватлем.wZFMlmc4YQs

 - Полимерный шун дене ик пашам ышташ мыняр жап кӱлеш?

- Чылажат нелылык деч шога. Иктым, мутлан, кок шагатыште ыштем гын, весылан ик кечат огеш сите. Кажне изделийым ыштыме паша процесс тӱрлӧ. Кӱчыкын ойлаш гын, эн ончыч мый шун гыч ужаш-влакым ненчем. Вара нуным 30 минутлан коҥгаш шындем. Украшенилан нине ужаш-влакым погем, кружкаш декорлан ыштенем гын, нуным кӱлеш семын клеитлем. 

 - Ты пашалан тунемаш кумылем лектын. Мастер-классым эртареда?

- Кумылан еҥлан поснат мастер-классым эртарем, групо денат пашам ыштем. Интернет занятий-влакым ом эртаре. Кеҥежым чылан отпускышто улыт. Садлан ты паша деч изиш каналтем шкежат. А шыжым кумылан-влак «Вдохновение» усталык студийыш мыйын мастер-классыш толаш ӱжам.

 - Могай кугу шонымашда уло?

- Шке брендем вияҥдынем. Мыйын ыштыме украшением-влакым Марий Элыште илыше еҥ-влак веле огыл, тыгак уло Российыште да вес эллаште чийышт. 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: