"Улам мый Рве-зы-лык!" рубрик, 2018 ий, Сорла тылзын 24-ше кечыже

Парикмахер, туныктышо да ургызо

Статьян авторжо Вероника Мустаева

Валентина Чемышева Шернур район Кугу Мушко ялын шочшыжо. Тӱҥалтыш класслам тысе школышто тунем пытарен. Вара  Шернур посёлкысо 1-ше №-ан школышто тунемын. Валян творческий шӱлышан улмыжо  тӱҥалтыш класслаштак палдырнен. Тудо моло тунемше-влак деч ойыртемалтын: сӱретшат мотор, кидпашажат чатка лийыныт. Туныктышо-влак 2-шо классыште  тунемше ӱдырлан художественный школыш тунемаш каяш  темленыт, но ава-ачаже икшывым тораш колташ ӧрыныт.Z2NfNND6evs
«Эн ондак мый курчаклан  вургемым ургенам, пидынам. Тыге кидпашам ышташ келшымым шижынам. Шернур школыш кайымеке, труд урокым эре вученам. Тушто ургаш, пидаш, тӱрлаш эше утларак шӱмаҥынам. Туныктышем  Галина Николаевна Светлаковалан кугу тау. Тудо  мылам шуко жапым ойырен. Урок деч варасе жапым арам йомдараш огыл манын, эре труд кабинетыште лийынам», — каласкала ӱдыр.
Валентина  ятыр гана олимпиадыште шке вийжым терген. Шуко гана районышто сеҥыше радамыш логалын. Олимпиадылан ямдылалтме годым шуко проектым возен. Нуно Валян кидпашаж дене кылдалтыныт.
Школым тунем пытарымеке, ончылно кугу корно почылтеш, ончыкылык профессийым ойырен налман. Шуко шоныде, Валя МарГУ-ш дизайнерлан заочно тунемаш пура. Тидын годым  жапым арам ок эртаре, парикмахерлан тунемеш. Образованийым налмеке, шочмо ялыш пӧртылеш, Шернур посёлкышто моторлык салонышто  налме профессий дене ышта.
«Ик ий заочно тунеммеке, очный формыш вонченам. Но дизайнер направлений дене огыл, а технологий ден информатикым туныктышылан. Туныктымо программе шукыжо кидпаша дене кылдалтын, садлан тунемаш келшен. Но тиде гына шагалла чучын. Тидын годымак  Йошкар-Оласе технологический колледжыш «Дизайнер, конструктор изделий» направлений дене тунемаш пуренам», — каласкала Валентина.
МарГУ-што ургаш,  технологический колледжыште конструироватлаш туныктеныт, сандене Валя вургемым шке ургаш тӱҥалын. Ондак шкаланже веле урген гын, варарак йолташ ӱдыр, палыме-влак йодыныт.  Тыге ӱдыр студент пагытыштак пашам ышташ тӱҥалын.  Кӧлан ӱпым пӱчкаш, чиялташ, кӧлан юбкым ургаш але йолаш эҥырашым кӱчыкемдаш – чыла ыштен.
«МарГУ-м тунемын пытарымемлан идалык шуын, а колледжыште эше тунемам.  Налме профессий дене пашам ом ыште,  туге гынат кызытат йодмо почеш ургем. Ургымо годым мый канем. Теве шукерте огыл кеҥеж костюмым, юбкым  ургенам. Тыгак тӱрлӧ пылышкӧржым ямдылем.  Эн оҥай йодмаш – марлан кайышаш  ӱдырын чийыме фатаже. Тудымат уло кумылын урген пуэнам», — палдарыш ургызо.
А Валентинан эн кугу шонымашыже шке вургем ательем  почаш. Кид-йол пашам ышташ келшен толеш гын, чылажат лиеш.  Валентинан  мастар кидше куштылго да лывырге, сандене лишыл жапыште чыла шукталтеш манын ӱшанена.
Вероника
МУСТАЕВА.
Еш альбом гыч налме фото.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: