"Сылнылык тӱня" рубрик, 2018 ий, Идым тылзын 14-ше кечыже

Артист лияшак пӱралтын

Статьян авторжо Анастасия Эманова

Марий Элын калык артисткыже Марианна Сильвестрова сценыште чыла гаяк рольым модын кертеш. Ик спектакльыште тудо шыма ӱдыр, весыште – виян ӱдырамаш, кумшышто – весела рвезе. Илышыште Марианна Панфиловна – сай ава да йолташ.  Тудо чыла еҥ дене тыматлын мутлана. Шинчаончалтышыже поро, но южгунам шӱлыканла коеш…

Шуко еҥлан Марианна Сильвестрова драматический актрисе семын палыме. Тудо Курыкмарий драме театрыште, Йошкар-Олаште самырык-влаклан театрыште пашам ыштен, а  2014 ий годсек артистке Курчак театрыште тырша.  

IMG_4829 - Марианна Панфиловна молан артист профессийым ойырен налында, а мутлан, врач але туныктышо пашам огыл?

- Мый Курыкмарий район Сухин ялыште шочын-кушкынам. Когосола (Троицкий Посад) селасе школышто тунемме годым йолташем-влак дене школышто тӱрлӧ сценкым ончыктенна. Йолташ ӱдырем Лидия Кучера дене пырля концерт программым ямдылена ыле. Садлан изинек усталык шӱлышан кушкынам манын кертам. Сцене деч лӱдын омыл, мылам тиде оҥай лийын. Такшым авам мыйым педагогым ыштынеже ыле. Тудо шкеже 42 ий Когосола школышто пашам ыштен, тӱҥалтыш классламат туныктен, пионервожатыят, директорат лийын. Но туныктышо паша мыйынлык огыл. Мый школ деч вара Козьмодемьянск оласе ик йочасадыште воспитательлан идалык пашам ыштен онченам. А вара авам бухгалтерлан тунемаш пураш темлен. Тудын кумылжым волташ огыл манын, Ежовысо Марий аграрный колледжыш толынам. Цифр-влак куаным конден огытыл, чонем творчествым йодын. Кок тылзе тунеммеке, документем налын каенам. Авамлан кеч-мом ыште, бухгалтер паша мыйынлык огыл манынам. Вара авамын мутшым колыштын, библиотекарьлан тӱвыра да сымыктыш колледжыш тунемаш толынам. Но набор ты специальностьлан огыл, а театрализоватлыме представленийын режиссержылан веле лийын. Очыни, артист лияш пӱралтынак. Колледжыште тунемме пагытым порын веле шарналтем. 

Vov-0022- Дипломым налмеке, вигак театрыш паша толында мо?

- Уке. Пайскырык кыдалаш школышто ик ий туныктышо-хореографлан пашам ыштенам. 1994 ийыште Курыкмарий драме театр почылтын. Тушко мыйым режиссерын полышкалышыжлан налыныт. А кок ий гыч театрыште артисткылан пашам ышташ тӱҥалынам. Тыштак ончыкылык пелашем Александр Иванович Сильвестровым, чаманен каласыман ӱмыржӧ тудын кӱчык лийын, вашлийынам. Самырык-влаклан театрыш режиссер Олег Геннадьевич Иркабаев Сашам ӱжын ыле. Мыят пырля толынам. Тыге 2012-2014 ийлаште тушто пашам ыштенна. А вара Курчак театрыш толынна.

- Драме да курчак театр-влак тӱрлӧ улыт. Курчак дене модын моштыман, тудым «иландарен» кертман. Драматический актрисылан курчак спектакльыште модаш неле лийын огыл?

- Пелашем дене 2006 ийыште Озаҥ оласе тӱвыра да сымыктыш кугыжаныш университетысе театральный факультетым курчак театрын артистше специальностьлан тунем пытаренна. Курыкмарий драме театрыште тӱрлӧ спектакльым ончыктенна. Ятыр курчак постановкышто модынна. Садлан ты театральный искусство чылт палыдымыжак огыл. Йошкар-Оласе Курчак театрыште коллектив мемнам порын вашлийын, коллегем-влак Эльвира Лисицына, Надежда Медведева шукылан мыйым туныктеныт.      

- Кум тургым деч вара шукерте огыл «Панночка» спектакльым театрыште угыч ончыктышт. Тушто модмыда годым чондам могай шижмаш авалтен?

- Курчак театрыш пашаш толмеке, Озаҥыште пашам ыштыше режиссер Татьяна Лядова мыланна Курыкмарий театрыште ончыкталтше икмыняр спектакльым Курчак театрын сценыштыже шындаш темлен. Тыге 2015 ийыште «Панночка» постановкым калык ончыко лукмо. Тушто тӱҥ рольым, Хома Брутым, Саша модын ыле. Но колымыжлан кӧра спектакльым кум тургым ончыктен огынал. Саша моткоч уста актер лийын. Тудын пашажым шукын палат, шарнат. «Панночкам» угыч шындымылан куаненам. Мый тушто Хвеськан рольжым модам. А тӱҥ рольым самырык артист Данила Гребневлан ӱшаненыт. Талантан, ушан, лудаш йӧратыше рвезе. Хома Брутын образшым тичмашын почын пуэн, шонем.

- «Прозоровы. Эпитафия» спектакльыште виян, озаланыше ӱдырамашым модыда. Ты спектакльыште вес рольым модаш шонен огыдал?

- Постановкым Антон Чеховын «Три сестры» пьесыж почеш шындыме. Тудын режиссержо – Санкт-Петербургышто пашам ыштыше Александр Стависский. Тыгай еҥ дене пашам ышташ пиаллан шотлем. Тудо шке пашажым палыше, артистлан могай роль келшен толмым ужын моштышо режиссер. Мылам Александр Стависский Наташан образшым чоҥаш ӱшанен. Такшым мый Ольга кугурак акан (тудым Эльвира Лисицына модеш) рольышто шкем эн ончыч ужынам ыле.

- Ӱдырдам театрыште шуко гана ужынам. Тудо тендан модмо рольланда акым пуа?

- Вика ӱдырем деч критикым эреак колам. Южо спектакль деч вара вес гана тиде постановкым ончаш ом тол манын ойлен кертеш. Тудо кызыт Йошкар-Оласе Президентский школышто режиссер Василий Александрович Пектеевын чумырымо театрально-литературный классышкыже коштеш, нылымше классыште тунемеш. Вика сценым йӧрата. «Бедный Акакий» спектакльыште актрисе Аня кок ӱдыр дене лектеш. Ик ӱдыржӧ мыйын, весыже – актрисе Надя Медведеван. Нуно тушто мурым мурат. Курчак театрыште Данил эргым осветительлан, видеооператорлан пашам ышта. Артем эргымат творчествылан шӱман, тудо икмыняр семӱзгар дене, поснак гитар дене, мастарын шокта.Vov-0060

- Тыланда могай роль чонланда лишылрак?

- Кажне модмо рольышкем чон шокшем, моштымем пыштем. Курчак театрыште йоча-влаклан веле огыл, кугыеҥ-шамычланат спектакльым ончыктена. Ме вес театр денат пашам ыштена. Мутлан, майыште руш драме театрыште «Кровь и лёд» поэтический спектакльыште модынам. Тушто ты театрын артисткыже Жанна Тимченко дене пырля поэтессе Марина Цветаеван почеламутшо-влакым лудынна.   

 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: