"Рубрик деч посна", 2018 ий, Идым тылзын 14-ше кечыже

Когыльым кочкаш йöратена

Статьян авторжо Елена Годунова

13 сентябрь шарлоткын да шыже когыльын кечышт. Шукынжо шарлоткым август, сентябрь, октябрь тылзылаште ыштен кочкыт. «Кугарня» газетын пашаеҥже-влак шыжым могай когыльым утларак кочкыт? Тыланда рецептыштым темлат, ыштен ончыза.

vv_9AWS29goАнастасия Эманова:

- Мый ялыште шочын-кушкынам, сандене пакчасаска гыч ямдылыме когыльым поснак йöратем. А ялысе коҥгаште кӱктымö когыльын тамже эшеат тамлын чучеш. Авамын кинде руаш дене кӱэштме йошкарушмен, олма когыльыжо моткоч тутло. Тыгак эҥыж дене ыштыме перемечше, подкогыльыжо умшаште шула, шонет. Тений кеҥежым эҥыж подкогыльо дене сийлен. Такшым мый шкежат кӱэшташ кумылан улам. Очыни, кажне озаватын шке рецептше уло. Мый шарлоткым ышташ йöратем, сандене шке рецептем тыланда темлем. Тидлан кӱлыт: 4 муно, ик стакан сакыр, ик стакан ложаш, олма, корице. Сакырым, муным, ложашым сайын лугыза да 10 минут наре шинчыктыза. Ӱй дене йыген ырыктыме салмаш падыштыме олмам пыштыза, вара корицым шавалтыза да вартышым опталза. 180-190 градусан духовкыш 40 минутлан кӱкташ шындыза.

Nqc9I1XlZ-UВероника Мустаева:

- Шыже пагыт олмалан поснак поян, сандене шарлоткым ышташ йӧратем. Кажне еҥын кочкаш ыштыме рецептше шкешотан. Мый гын тиде рецептым Ижевск олште финн курсышто лийме годым финн туныктышо-влак деч тунемынам.
Кӱлыт: 220 грамм ушкал ӱй, 10 грамм сакырложаш, 3 муно, изи совлан чырык ужаш ванилин, тынарак шинчал, корице, лимон шӱм, 300 грамм ложаш, пел стакан шӧр, 4-5 олма, мороженый. Ӱйым сакыр дене лугыза, муным, шинчалым, ванилиным, тыгыде рожан теркеш колтымо лимон шӱмым пырля лугыза. Тушкак изин-изин ложашым ешарыза. Немыр лиймешке, шӧрым пыштыза. Салмам ӱй дене йыгалтыза да сукара пудыргым шарыза. Ӱмбакыже йыргешкын дене пӱчкедыме олмам оптыза. Руашым ешарен, ӱмбакыже корицым шавалтыза да 20 минутлан 200 градусан духовкыш шындыза. Ӱстелыш шындыме деч ончыч шокшо когыльо ӱмбак мороженыйым пыштыза. Шарлоткым мяте лышташ дене сöрастарен кертыда. Тыгак изиэм годым ковам полан когыльым ышта ыле. Чаманен каласем, кузе ыштымыжым возен налын омыл.

GaEoM1auoFcИрина Шибанаева:

- Чынжымак, шыже когыль нерген ойлымо годым ушышко вигак шарлотко толеш. Мый тыланда сливе дене ямдылыме шарлотко рецептым темлем. Тидлан кӱлыт: 6-8 сливе, 3 олма, 2 муно, 1 изи совла содо, 2 стакан высший сорт ложаш, 15 г ванилин, 1 стакан сакыр, 1 стакан кефир. Муно дене сакырым сайын лугыза. Тушко содым, кефирым, ванилиным ешарыза. Тылеч вара ложашым эркын ешарен, сайын лугыза. Ырыктыме, ӱй дене йыген ямдылыме салмаш олмам, сливым падыштыза. Вара руашым опталза. 190-200 градусан духовкышто 35-45 минут наре кӱктыза.

золотареваИрина Золотарёва:

- Шагал жапым налше когыльо-влакым кӱэшташ йöратем. Його штрудельым ышташ темлем. Кӱлыт: иктаж ныл олма, кум кугу совла сакыр, армян лаваш, ӱй але ӱмбал.
Олмам вичкыжын пӱчкедыза. Сакырым шавалтен, салмаште сок изишак пучымешке тушитлыза. Лавашым шаралтыза, левыктыме ушкал ӱйым але ӱмбалым йыгалтыза, олмам оптыза. Уло гын, пӱкшым, изюмым ешараш лиеш. Лавашым рулет семын пӱтыралза, адак ушкал ӱйым але ӱмбалым йыгалтыза да противеньыш пыштыза. 200 градус марте ырыктыме духовкышто 20-30 минут кучыза. Шукырак еҥлан ыштеда гын, икмыняр лавашым тыге пӱтырен пышташ лиеш. Йӱкшымеке, штрудельым икмыняр ужашлан пӱчкедыза, ӱмбакыже сакыр пудрым шавалтыза.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: