"Увер" рубрик, 2018 ий, Идым тылзын 7-ше кечыже

Пенсионер-влаклан льгото тугаяк кодшаш

Статьян авторжо Анастасия Эманова

4 сентябрьыште Мер-политик рӱдерыште «О планируемых поправках в региональное законодательство, связанных с изменениями в пенсионной системе» темылан брифинг лийын.

20180904_112840Тудым «Единый Россий» партийын Марий пӧлкажын секретарьже В.Мухин да Марий Эл Республикысе Кугыжаныш Погынын социальный вияҥмаш шотышто комитетшын председательже О.Цветкова эртареныт.

«Единый Россий» фракцийын Марий Элысе пӧлкаже республикыште ӱдырамаш-влаклан 55 ийым темымеке, а пӧръеҥ-шамычлан 60 ийым темымеке, улшо льготым арален кодыме шотышто законопроектым пурташ Кугыжаныш Погынлан темлен. В.Мухин каласен: Марий Эл Правительстве тидын дене келшен да Кугыжаныш Погын законопроектым 20 сентябрьыште онча. О.Цветкован мутшо почеш, тиде законопроектым илышыш огыт пурто гын, еҥ-влак льготым пенсийыш лекме деч вара веле налаш тӱҥалыт. А ме чылан палена, Российыште пенсий ийготым таче-эрла огыл кугемдат.

Кызытеш 247 тӱжем еҥын льготыжо уло, тушеч 65,4 тӱжемже – региональный льготник.

Каласыман: 3 сентябрьыште Марий Эл Республикым вуйлатыше А.Евстифеев Марий Эл Кугыжаныш Погынын председательже Ю.Минаков дене вашлийын. Александр Александрович пенсионер-влакын улшо льготыштым арален кодаш, тыгак кажне тылзын выплатым, ЖКХ-лан да общественный транспорт дене коштмылан ешартыш оксам тӱлаш кӱлмӧ нерген ойлен. «Кугыжаныш Погын 20 сентябрьыште сессийыштыже льгото шотышто законопроектым пеҥгыдемда», – сӧрен Юрий Минаков.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: