"Рубрик деч посна", 2018 ий, Идым тылзын 14-ше кечыже

«Самырык еҥ, ончылно лий»!

Статьян авторжо Елена Годунова

2owIr9Ta0wAТыге ойлымо кажне самырык еҥым шке цельышкыже шуаш тарата, шонем. Сандене кажне гана ушан, чолга, шке шонымашкыже шуаш тыршыше ӱдыр-рвезе-влак дене мутланыме годым нунын дене кугешнаш кумыл лектеш. Теве Оршанке район Кугунур селаште шочын-кушшо Ирина Павлова дене палыме лийна.

Ирина Кугунур кыдалаш школышто тунемын. Йочасадыш коштмыж годымак тысе «Шонанпыл» ансамбльын ешышкыже ушнен. Йоча годсо жапшым ӱдыр тыгерак шарналтыш:

- «Шонанпыл» ансамбльын участницыже лиймем дене моткоч кугешнем. Тушто ме тӱрлö куштымашым тунеммынна, мурым муренна. Школышто тунеммем годым тӱрлö олимпиадыште уш-акылем тергенам. Руш литератур ден ИКН предметла дене районын чапшым республик кӱкшытыштат араленам.

И.Павлова школышто тунеммыж годым туризм сферыште специалист лияш шонен. Но ты профессий дене бюджет вер шагал лиймылан кöра МарГУ-со историко-филологический факультетын журналистике пöлкашкыже тунемаш пурен. Студент годым ӱдыр самырык этножурналист школыш коштын, «Арслан» журнал редакцийыште пашам ыштен. Тидын нерген тыгерак каласкалыш:

- Самырык этножурналист школышто творческий шӱлышан ӱдыр-рвезе-влаклан кушкашышт чыла йöн уло. Тушто ятыр опытым погенам, шуко йолташ-влакым муынам. Такшым мый журналист веле огыл лийынам, тыгак тӱрлö форумыш, семинарыш коштынам. Мутлан,Клязьма олаште «Территория смыслов», Самара областьыште «iВолга» форумлаште лийынам. Тыгак Ульяновскышто проектым возаш туныктымо семинарыште, Владикавказыште «Народы мира» форумышто участвоватленам. Мутат уке, пӱтынь эллысе самырык ӱдыр-рвезе-влаклан эртаралтше форумлаште лиймым порын шарнен илаш тӱҥалам.

Форумлаште «Бегом за оператором. Найди 10 положительных сюжетов о Марий Эл» проектым темленам. Тудын тӱҥ шонымашыже — кундемыштына илыше йоча-влаклан шке илыш умылымашышт гоч Марий Эл Республикысе мотор вершöрым почын ончыкташ. Тидыже нуным кундемна дене лишкырак палымым ышташ да мотрлыкшым ужын мошташ туныктышаш. Проект утларакшым конкурсым эртараш келшен толеш. Но тӱрлö амаллан кöра тудым эше мучаш марте ыштен шуктымо огыл.

Кызыт Павлова ПГТУ-ш туризм направлений дене магистратурыш тунемаш пурен. Ӱдырын школ годсо шонымашыже шукталтын. Ынде тудо илышыжым тӱрыснек туризм дене кылдаш шона. Тидлан ончыко сай шонымаш дене ошкылаш да кыртмен тыршаш кӱлеш, манеш. ГТРК компанийыште журналист сомылым ыштен ончен. Сандене тудын деч журналист могай лийшаш манын йодым. Вашмут тыгайрак лие:

- Журналистлан тӱрлö темым почын пуаш логалеш. Сандене эн ончыч тудо шуко палыше, ушан, колын да колыштын моштышо, чыла вере шуаш тыршыше, тӱҥжö – шке пашажлан чон йӱлен тыршыше лийшаш.

Илен-толын, Ирина ала журналистат лиям манын шона. Вет тудо цельышке шуаш тыршыше, чолга, творческий ӱдыр.

2owIr9Ta0wA

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: