"Олимп" рубрик, 2018 ий, Идым тылзын 14-ше кечыже

Тренерын темлымыжым эреак шотыш налеш

Статьян авторжо Анастасия Эманова

Артур Матвеев куштылго атлетике дене 2014 ий годсек заниматла. Тудо кызыт Йошкар-Оласе олимпийский резерв училищыште кумшо курсышто тунемеш. Артур тыршен тунеммыжлан да спортышто сай результатыш шумыжлан тений Марий Эл Республикым вуйлатышын стипендийжым налеш.

Q9PwPoXHPrAА.Матвеев – Шернур район Чисола ялын шочшыжо. Тудо изинек спортлан шӱман кушкын, поснак куржталаш йӧратен. Тидлан кӧра Кукнур школ деч вара тудо Олимпийский резерв училищыш тунемаш пурен, туныктышо-тренер лияш ямдылалтеш. Артурын куштылго атлетике дене икымше кугыеҥ разрядше уло. «Тренерем Константин Петрович Лукьянов – кугу профессионал. Тудын темлымыжым эреак шотыш налам, мутшым колыштам. Спортсменын шке режимже уло. Мый кажне кечын шым шагат эрдене кынелам. Икымше тренировкем индеш шагатлан тӱҥалеш да лу шагатат кумло минут марте шуйна. Латик шагат гыч латкуд шагатат лу минут марте училищыште занятий-влак лийыт. Тылеч вара латкуд шагатат кумло минут гыч латкандаш шагат марте кокымшо тренировкым ыштем. Лу шагат кастене малаш возам.

Шуко таҥасымаште лийынам, чаманен каласыман, эрежак огыл сай результатым ончыктенам. Тений чыла шотыштат сай манын ойлен кертам. Кеҥежым Пенза олаште куштылго атлетике дене 18 ияш ӱдыр да рвезе-влак коклаште Юл кундем федеральный округын первенствыже лийын. Тушто мый шӧртньӧ медальым налынам. Марий Эл Республикым вуйлатышын стипендиантше лийынам. Ӱшанем, ончылно мыйым спорт сеҥымаш-влак вучат. А тиде арнян шуматкечын «Нацийын кроссшо» таҥасымаште участвоватлем. Тидлан кызыт кыртмен ямдылалтам». 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: