"Улам мый Рве-зы-лык!" рубрик, 2018 ий, Идым тылзын 7-ше кечыже

Тӱняште порылыкым шарыман

Статьян авторжо Анастасия Эманова

Тыге шона Йошкар-Олаште шочын-кушшо ӱдыр, МарГУ-н студенткыже Татьяна Жирова. Тудо волонтёр пашаш икымше курсышто тунеммыж годым ушнен. 2017 ий годсек Таня Марий кугыжаныш университет пеленысе «Молодежь Марий Эл за будущее страны» добровольчество рӱдерым вуйлата.

ev-S8kB2ZCYТ.Жирова Экономике, управлений да финанс институтышто бизнес-информатике направлений дене нылымше курсышто тунемеш. Чолгалыкшым ӱдыр тунеммаште веле огыл ончыкта. Тудо шымлыме паша-влакым воза, вузышто эртыше тӱрлӧ культур мероприятийыште участвоватла, мураш, кушташ йӧрата. Но чонжылан эн чот волонтер паша келша. «Волонтер лияш школышто тунемме годымак кумылаҥынам. Но шонымашем МарГУ-ш тунемаш пурымеке веле шукталтын. Эн ончыч вузышто тӱрлӧ мероприятийым эртараш полшенам, вараже оласе, республикысе тӱрлӧ фестивальым эртарымаштее лийынам. МарГУ-што кажне манме гаяк факультет могай-гынат волонтер пашалан вуйын шога. Ик волонтер группо тӱрлӧ мероприятийым эртараш полша гын, весе тулык йоча, шоҥгыеҥ-влак дене пашам ышта. Тӱрлӧ организаций «Молодежь Марий Эл за будущее страны» добровольчество рӱдерын волотентержо-влак деч полышым йодеш. Мутлан, ӱмаште ик шоҥгыпӧрт гыч мыланна возеныт, окнам мушкаш полшаш йодыныт. Тушко волонтер группым колтенна», – ойла студентке-волонтёр.

- Таня, рӱдерым вуйлатыше семын могай пашам ыштен шогет?

- Тӱҥ шотышто тӱрлӧ пашалан волонтер-влакым чумырем. Ышталтше данный базым почам, да тушто мероприятийыш келшыше волонтер-влакым ойырен налам. Тыгак волонтер огыл, но ты пашаш ушнаш кумылан ӱдыр-рвезе-влакымат иктаж-могай мероприятийым эртараш полшаш йодам. Рӱдерыштына таче кечылан 500 утла волонтер шотлалтеш. Командышкына икымше курсын студентше-влак эше ушнат манын шонена.

- «Вконтакте» сайтыште «Молодежь Марий Эл» группышто тыйын нерген Егор Гайдар лӱмеш стипендиантке улат манын возымо. Ты стипендийым могай пашам ыштыметлан пуэныт?

- Егор Гайдар лӱмеш российский премийым экономический направленийыште тунемше лу студентлан кажне ийын пуат. Тиде премийым налме конкурсышто участвоватлаш мыланем ӱмаште факультетыште темленыт. Мый тунемме деч посна эше экономике дене кылдалтше научный статья-влакым шкеак да педагог-влак дене пырля возкалем. Страхований, миграций да моло темылан материалем-влак тӱрлӧ сборниклаште савыкталтыныт. Гайдар лӱмеш премийым лачак научный пашам ыштымылан пуат. Портфолиом погенам да конкурсыш колтенам. Тыгай статья-влакым мый кок ий возенам. Ӱмаште Москошко Экономике кӱшыл школын эртарыме научно-практический конференцийышке миенам. Научный статья-влакым возымыланак тений Марий Эл Республикым вуйлатышын стипендийжым налам.

- Августышто Самара областьыште Юл кундем федеральный округысо самырык-влакын «iВолга-2018» форумышт лийын. Тыйын ямдылыме проект тушто ик эн сайлан шотлалтын. Мо нерген тудо?

- Мый «Политике, молодежный самоуправлений» сменыште лийынам. «Культурный выбор» проектем ны волонтерство, ны научный паша дене кылдалтын огыл. Мый ом йӧрате, кунам самырык-влак кӱлеш оккӱл мутым кучылтыт, поснак общественный верлаште. Проектем культурынам нӧлташ шонымаш дене ышталтын. Тудым «iВолга-2018» форумын организаторжо-влак сайлен шотленыт да 200000 теҥге грантым пуэныт. Тиде грантым «Юл кундем федеральный округышто гражданский обществе институт-влакым вияҥдаш полшышо фонд» коммерческий огыл организаций реализоватлаш полша. Командем оласе кафе ден ресторан дене кылым ышта. Тыгай верлашке толшо еҥ шыман мутлана, саламлалтеш гын, тудлан кафе скидкым ышта але иктаж сувенирым кучыкта. Икмыняр кафе пырля пашам ышташ келшен. Грант оксам сувенирым, иктаж сувенирым шкеак ышташ техникым  налаш кучылтына. Марла мутланыше еҥ-влакланат кафеште изирак пӧлекым пуаш темленыт. Молан уке?

- Чолга студент улмет кушто эше палдырна?

- Творчествылан шӱман улам. Изинек музыкым йӧратем. Авам политехничесий лицейыште музыкальный вуйлатышылан ышта. Йошкар-Оласе 19-ше №-ан школ пеленысе музыкальный школыш хореографий классыш коштынам. Тылеч посна тушто фортепиано дене шокташ тунемынам, вокал классыште заниматленам.  Вузышто эртаралтше «Студент шошо» да «Самырыкын йӱкшӧ» мероприятийлаште мастарлыкем ончыктем.

- Шуко форумышто лийында. Могайже эн чот шарнымашеш кодын?

- Сочиште ӱмаште 14-22 октябрьыште эртаралтше самырык тукымын да студент-влакын XIX тӱнямбал фестивальыштым нигунам ом мондо. Пеш кугу фестиваль лийын. Тудо 180 утла эл гыч 25 тӱжем участникым да 5 тӱжем волонтерым иктыш чумырен ыле. Мый фестивальын образований дене кылдалтше, культур да моло площадкылаштыже лияш тыршенам, шуко еҥ дене палыме лийынам. Артист Сергей Безруковым тушто ужынам. Тидат сай шарнымашым коден. Эше ик гана ты мероприятийыш миен толаш йӧн лектеш гын, моткоч сай ыле.

- 2018 ий Российыште Доброволец (волонтёрын) идалык семын увертаралтын. Могай вашталтыш ты аланыште шижалтеш?

- Добровольчестве дене кылдалтше мероприятий-влак шуко эртаралтыт. Мутлан, 8-12 августышто «Каменная речка» санаторий-профилакторий пелен самырык-влакын форумышт лийын. Тушто мый «Добровольчество» сменыште участвоватленам. Тушто командына шкешотан проектым ямдылен. Шуко самырык еҥын ушыштыжо эре могай-гынат идей уло. Но илышыш тудым пурташ ресурсшо уке. Ме самырык еҥлан тидлан кузе полшаш лийме площадкым ышташ шонена. Кызыт Йошкар-Ола администраций дене мутланен келшенна, пырля ола рӱдыштӧ тыгай площадкым У ий деч ончыч але варарак почаш шонена.

- Вес эл гыч толшо студент-влак волонтер лияш кумылыштым ончыктат мо?

- Чулым улыт. Рӱдерышке толын, иктаж мероприятийым эртараш полшаш йодыт. Икмыняр тылзе ончыч Египет гыч толшо рвезе волонтер лияш кумылжым луктын. Ме тидлан куанена веле.

- Ончыкылык планет могай?

- Шонымаш пеш шуко. Кызыт ик эн тӱҥ задачем: сеҥен налме грант окса дене проектым илышыш пурташ. Университетым сайын тунем пытараш да добровольчествым республикыштына вияҥдаш. Кызыт утларакшым тӱрлӧ мероприятйиым эртараш полшена, ончыкшым студент-влакым социальный пашаш ушаш, мутлан, тулык йоча-влаклан чотрак полшаш шонымаш уло. Школьник-влакымат волонтер пашалан шӱмаҥдыме шуэш. Озаҥыште лийше ик форумышто волонтер школьник-влакым ужынам. Тиде мыйым ӧрыктарен да мый тунам Йошкар-Олаште школышто тунемше-влакым молан волонтер пашаш огына ушо манын шоналтенам. 

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: