"Олимп" рубрик, 2018 ий, Идым тылзын 14-ше кечыже

Физкультур – йӧратыме предмет

Статьян авторжо Анастасия Эманова

Мыланна возат

Татарстан Республик Агрыз районысо Буймо школышто ик эн тӱҥ направлений – спорт да тазылыкым пеҥгыдемдыме паша.

Тунемме ий мучко мемнан дене куштылго атлетике, ече дене коштмо, теннис, футбол, волейбол дене таҥасымаш-влак, «Веселые старты», «Снайпер» модмаш-влак эртаралтыт.

Физически шуаралтмылан кӧра йоча-влак пеҥгыдырак лийыт, ГТО нормативым куштылгын темен кертыт, командыште пашам ышташ тунемыт, районышто веле огыл. Республике кӱкшытыштат спортышто сай резуальтатыш шуыт.

Тунемше-влак физкультур урокым пеш йӧратат, чыла гаяк спорт мероприятийыште кумылын участвоватлат. Модмо йӧным кучылтын, йочалан сай шинчымашым пуаш лиеш, тӱҥжӧ – нине модыш-влак икгай огыл, а эре тӱрлӧ лийшаш улыт. Икшыве-влак ик физкультур занятийымат огыт кодо.

Куандара: южо выпускникна илышыштым спорт дене кылдат. Мутлан, 2016 ийысе выпускникна Роман Михайлов Озаҥ оласе спорт академийыште тунемеш. Кодшо тунемме ийын выпускникше-влак Роман Альматов ден Полина Самуткина тыгак спорт вуз-влакым ойырен налыныт.

Спортым кузе йӧраташ огыл, вет школыштына физический культур дене заниматлаш чыла йӧн ышталтын, кӱлеш инвентарь, оборудований, спорт площадке улыт. Тунемме идалык мучко спортзалыште да тӱнӧ спорт занятий-влак эртаралтыт, тазалыкым аралыме да пеҥгыдемдыме шотышто икшыве-влак дене эре мутланена, урок деч посна йоча-влак спорт секцийыш да кружок занятийлаш коштыт.

Физкультурым туныктышо-влак Виталий Семёнов да тудын Игорь эргыже йоча-влакым спортлан шӱмаҥден шогат, спорт оборудований сайын пашам ыштыже да нигуш ынже йом манын эскерен шогат, тӱрлӧ нелылыкым сеҥен лекташ туныктат. Йоча-влак пеҥгыде койыш-шоктышан лийышт манын тыршат. Нунын тунемшышт ече дене Всероссийский таҥасымаште участвоватлат, спортын тӱрлӧ видше дене районысо да республикысе турнирлаште призер да сеҥыше радамыш эреак логалыт.

Йоча-влак спортым йӧратат. Мутлан, Богдан Павлов. Йӱран игечым але чатлама йӱштым ончыде, кажне эрдене куржталаш лектеш. Вий-куатшылан, туныктышо-влакын урокыштлан, тренер-шамычын туныктен ойлымыштлан кӧра Богдан спортышто сай кӱкшытыш шуын. Тудо – ече дене Татарстанын сборныйжын членже.

Туныктышына-влакат таза илыш-йӱлам кучат, примерым ончыктат. Мутлан, икымше лум возеш веле, а директор Эдуард Михайлов ече дене коштеш. Таклан огыл тудо Татарстан Республикын спорт министерствыжын почетан грамотшо дене палемдалтын.

Ме тунемшына, туныктышына да тренерна-влак дене кугешнена! Тыланена эшеат кугу спорт сеҥымашым! Тений Буймо школ «2017-2018 тунемме ийыште йоча-влакым воспитатлыме да ешартыш образованийым пуымо шотышто эн сай организаций» районысо рейтингыште сеҥен.

Оксана Корнева, Буймо школын туныктышыжо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: