"Чон-кумыл паша" рубрик, 2018 ий, Идым тылзын 7-ше кечыже

Шинчам куандара, кумылым нӧлта

Статьян авторжо Анастасия Эманова

Морко ӱдыр Христина Токпулатован пашаже-влакым ужын, тыге ойлаш лиеш. Кидмастар крючок дене модыш-влакым пидеш. Тыгай модышым йоча-влаклан пӧлеклаш пеш сай, тудо нимогай аллергийым огеш лук.

токпулатова24 ияш ӱдыр Шордӱр ялыште шочын-кушкын. Кидпашалан тудым аваж ден коваже туныктеныт. «Авам пеш чаткан пидеш. Но кидпашалан тӱҥ шотышто мыйым авамын могыр гыч ковам, уныкаже-влак тудым Шаша вавай манынна, туныктен. Изиэм годым ковамын пидмыжым ончен, мыйынат ты пашам ыштен ончаш кумыл лектеш ыле. Тыгодым мылам чучын, пуйто спице дене пидаш йӧнан огыл, неле.  Мый Шордӱр школышто, тунам эше кыдалаш ыле, 6-шо классыште тунеммем годым нарынче тӱсан упш ден шарфым  крючок дене пидынам. Тиде икымше кугу пашам лийын. Йӧратен чиенам. Акамлан келшен да тудлан пуэнам. Шканем весым пидам манын шоненам, но ыштен шуктен омыл», — манеш кидмастар.

6dGPpu65pd8Христина ешан. Пелашыж дене Псков область Красногородск поселкышто илат, эргым ончен куштат. «МарГУ-со экономический факультетым тунем пытаренам. Студентке годым марлан лектынам, да 2015 ийыште ешнам пӱрымаш Псков кундемыш конден. Тушто чылажат палыдыме. Йолташем-влак пеленем уке улыт. Чонемлан йокрок лийын, садлан кидпаша полшен. Пелашемын акажын ӱдыржылан пӧлекым ышташ шоненам. Ужар тӱсан шӱртым налынам да интернетыште туддене кофтым пидме шотышто лӱмын мастер-классым кычалынам. Шинчамлан JKAq1R3xCok амигуруми техникыште ыштыме ужава пернен. Мылам тидыже оҥай лийын. Амигуруми – крючок але име дене модышым пидме япон искусство. Модышым спираль семын пидман. Вара ярым дене темыман. Тыге амигуруми модыш пушкыдо да объемный лиеш. Мылам ты техникыште пидаш моткоч чот келша. Тидын шотышто шкежат мастер-классым кызыт ямдылем. Ончыкшым тудым интернет гоч онлайн режимыште эртарынем да ужалынем», — мут мундыражым умбакыже шуя Х.Токпулатова.

q3wKTZETLgEКидмастарым творчествылан йоча-влак шӱмаҥден шогат. Тудо икшыве-шамычлан пашаж дене куаным конда. Ончыкшым Христина у техникылан тунемнеже. «Ирландский кружевам крючок дене пидаш тунемнем. Но тиде пеш неле да тӱткышым йодшо паша. Кызыт тидын шотышто еҥын пашажым веле йӧратен ончем. Кидпашалан йоча-влак кумылаҥдат. Мый йӧратем нунын кумылыштым нӧлташ, куан дене йӱлышӧ шинчаштым ужаш. Пидме модышым утларакшым пӧлек шотеш кучыктем. Тыгак еҥ-влаклан Вконтакте соцсетьысе «Вязаные игрушки и куклы <3 Красногородск» группыштем амигуруми пашам-влакым  жапын-жапын яра модын налаш йӧным ыштем. Иктаж курчакым пидаш йодмаш уло гын, тудым уло чон шокшем пыштен пидам. Мый вашкен ышташ ом йӧрате. Арняште ик модышым да тудлан тувырым пидын шуктем», — каласыш Христина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: