"Кугарнягудо" рубрик, 2018 ий, Идым тылзын 3-шо кечыже

«ИНТЕЛЛЕКТУАЛ» рÿдерын проектше ятыр

Статьян авторжо Вероника Мустаева

«ИНТЕЛЛЕКТУАЛ» тÿвыра-увер рÿдер тÿрлö социально кÿлешан проект-влакым кажне ийын илышыш пурта. Теве теният «Ресурс рÿдерын туныктымо да шымлыме проектше-влак» паша умбакыже шуйна. Тиде проектым Марий Эл Республикын тÿвыра, печать да калык-влакын пашашт шотышто министерствыжын программыж почеш илышыш шыҥдара.

SDFHZwVyhlgРӱдерын вуйлатышыже чулым еҥ — Эльвира Куклина. Эльвира Викторовна студент пагыт гыч тӱҥалын таче кече марте тунемеш. Ондак МарГУ-што историй да филологий пӧлкам тунем пытарен гын, кызыт ПГТУ-што «Государственное и муниципальное управление» специальность дене магистр лияш ямдылалтеш. Тылеч посна Москосо экономике да финанс институтым «Мастер делового администрирования» направлений дене тунем лектын. Тыгак форум ден семинарлаште шинчымашыжым пойдара. Паша верымат ятыр гана вашталтен: «Кугарня» газет редакций, Республикысе марий тӱвыра рӱдер, ООО «Марикино» директорын алмаштышыже, Марий самырык театр, ПГТУ-што кафедре пашаеҥ. Шуко вере тунеммыже, ятыр верыште шке вийым тергымыже тачысе корнышко луктын. Вуйлатыше лияш куштылго огыл, паша келша, чон шупшеш гын веле чыла нелым чытен лекташ лиеш. Шижалтеш Эльвира Викторовнан вийже ситышынак,.

Кузе да кунам «ИНТЕЛЛЕКТУАЛ» рӱдер шочын?

- Эше «Кугарня» газет редакцийыште ыштымем годым сайтым, интернет-журналым ышташ шоненам. Кузе ышташ? Кушто шийвундым муаш? — йодыш-влак тургыжландареныт. Тунам проектым возаш шонымаш толын. Шукыж годым проектым шке лӱм дене огыл, а организаций гоч колтыман, сандене 2011 ий 20 июньышто рӱдерым почмо. 2017 ий январь гыч тудо калык кокласе кыл да гражданский обществылан полшышо ресурс-рӱдер семын пашам ышта, — палдарыш Эльвира Викторовна.

«ИНТЕЛЛЕКТУАЛ» рӱдерын тӱҥ шонымашыже: тӱвыра, туныктымо, СМИ, туризм аланыште услугым темлымаш. Темлыме проект-влак тӱрлӧ да шкешотан улыт. Организацийын икымше пашаже-влак 2013 ийыште лектыныт: «Мари Арслан» этнокультурный интернет-журнал , «V марий самырыктукым слёт», «Самырык этножурналист школ».DSC_0775

Тылеч вара марий самырыктукымын VII, VIII слётшо-влак грантым налыныт. 2013 ий гыч таче кече марте «Самырык этножурналист школ» пашам ышта, 2014 ийыште «Марий блогер школ» семинар-тренинг лийын, 2017 ийыште марий йылме дене комиксым сӱретлыме мастер-класс эртаралтын. Тушто Финляндий гыч сӱретче Санна Хукканен туныктен. Тыште икмыняр проектым веле палемдыме, тыгак пеш шуко семинар ден вашлиймаш-влак эртаралтыт.

Теният проект-влак илышыш шыҥдаралтыныт: «Самырык этножурналист школ», «Ресурс рÿдерын туныктымо да шымлыме проектше-влак», «Ончылъеҥ школ», «Илыш куан» ӱдырамаш клуб, «Марий тÿр да моло кидпаша дене мастер-класс-влак» да молат.DSC_1005

Вич ий жапыште Самырык этножурналист школыш 250 утла еҥ коштын, тений – 6 еҥ. Нуно редакцийлаште лийыныт, тӱрлӧ мероприятийыш, вашлиймашыш миеныт, тыгак журналист паша нерген утларак пален налыныт, возымо статьяштым лончыленыт. Тений нунын кокла гыч Ольга Мошкина поснак ойыртемалтын. Тудым «Морко мланде» газетыш возаш йодыныт.

«Ресурс рÿдерын туныктымо да шымлыме проектше-влак» проектын ик мероприятийже тений мартыште эртен. Темыже «Ресурсное обеспечение деятельности этнокультурных НКО Республики Марий Эл» маналтеш. Тушко 80 утла еҥ погынен. Семинарым кок эксперт эртарен: Российысе калык-влак ассамблейын советшым вуйлатышын алмаштышыже Евгения Михалева ден медиаций федеральный институтын шанче пашаеҥже Николай Гордийчук. Тыгак проектым возымо, илышыш пуртымо шотышто семинар-влакым районлаште эртарат. Теве шукерте огыл тыгай семинар Кужэҥер районышто лие.

- Проект-влакым умбакыже мо вуча?

- Тений тыгак Самырык этножурналист школ пашам ышта да у тунемме ий гыч у группым погаш шонена. Октябрь гыч марий тӱр дене мастер-класс-шамыч пашам ышташ тӱҥалыт. «Илыш куан» ӱдырамаш клубын пашажым умбакыже шуэна. Тыгак «Марий йылме школ» проектна уло. Тудымат вияҥден колташ шонена. Кызыт ты школыш кумылан-влакым погена. Интернет-площадкына уло. Тидын нерген кумнданрак социальный сетьыште тӱшкаште пален налын кертыда. Вес ийын «Национальный блогер школ (SMM)» проектым илышыш пурташ шонена. Да моло проектнат ятыр.

- Шукерте огыл те кокымшо гана ава лийында. Кузе чыла шуктеда? Кушто вийым налыда?

- Жапым шке илышланат, ешланат, пашаланат, тунемашат муаш лиеш. Чылажымат йӧратен, уло кумыл дене ыштыман. Да, мыйын кызыт ныл тылзаш, 17 ияш эргым-влак улыт. Кажныжын шке йодмашыже… Вий-куатым погаш мылам ӱдырамаш клуб полша. Тушто вашлийын мутланымаш, тӱрлӧ упражненийым, медитацийым ыштымаш, физкультур дене кылым кучымаш, эреак тунемаш тыршымаш мыланем шуко сомылым шукташ полшат.

- Те проект дене чӱчкыдын пашам ыштеда. А могай темлымашда лиеш проектым возаш тӱҥалше-влаклан?

- Проект пашаште ик эн тÿҥжö – нигунамат вуйым сакыман огыл, рушла манаш гын, «никогда не сдаваться, не опускать руки»! Таче проектым кӱлеш семын аклен огытыл, таче тылат грантым пуымо огыл – тугеже эрла пиал шыргыжалеш. Кумыл ик татлан вола. Но вуйым кÿшкö! Угыч тунемаш, шымлаш да вес семынрак шке проектым ончалаш!

DSC_0938Проектат тÿрлö лиеш. Южо социальный пашам шийвундо деч посна ышташ лиеш, поро кумылым ончыктен. Да проектыште ресурс манмет тÿрлö уло: айдеме ресурс, партнёр-влак, кÿлешан увер да молат. Проектлан окса полыш кÿлеш гын, грантым пуышо-влакым кычалман. Грантым налшашлан проектым возымо годым чот тÿткö лийман: грантым пуышо организацийын чыла йодмашыже шотыш налалтеш. Тидлан конкурс нерген положенийым, инструкцийым сайын шымлыман. Икманаш, проектым возышо да илышыш шыҥдарыше еҥ эре тунемшаш. Тидым шотыш налынак, мый шкежат эре тыршем. Да кузе палемдышна, эше «ИНТЕЛЛЕКТУАЛ» организаций Ресурс рÿдер семын пашам ышта, сандене проектым возымо, илышыш пуртымо да умбакыже вияҥдыме шотышто семинарым, консультацийым эре эртарена. Толза! Кертмына семын полшена!

«Айдемылан шонымашке шуаш, кӱлешан да пиалан лияш полшаш» девиз дене Эльвира Викторовна ила.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: