"Улам мый Рве-зы-лык!" рубрик, 2018 ий, Кылме тылзын 30-шо кечыже

«Ида лӱд! чолга лийза!»

Статьян авторжо Вероника Мустаева

– ойла Виктория Богданова.

Вика Шернур район Купран ялыште шочыш-кушкын. Кызыт Озаҥ олаште ила. Тысе  федеральный университетышто экологий ден природопользований институтышто «Системная экология» кафедрын магистатурыштыжо тунемеш.

- Вика,  молан лач тиде корным ойыренат?Мо дене тудо сымыстарен?

- Экологий мылам школ пагыт гычак келшен. Слётлаш чӱчкыдын  коштынам,  тиде предмет дене олимпиадылаште шке вием тергенам. Кудымшо классыште «Калипсо» экологий кружокыш коштшо-влак дене пырля походыш икымше гана миенам. Тушто мыйын гаяк ӱдыр-рвезе-влак дене палыме лийынам. Нунын йӱлышӧ шинчаштым ужын, шке шонымашыштым колыштын, мыят нунын ешыш пуренам. Кружок Купран школ пелен лийын, тудым Людмила Петровна Чеснокова вӱден. Купран школышто индеш классым тунем пытарымеке, Шернур посёлкысо 1-ше №-ан школышто биологий да химий классыште тунемынам. 11-ше класс деч вара Озаҥ олаште шинчымашым погем. Университетыште тунемаш келша, но тыгодым шуко уым кычалман. Кызытсе саманыште, илыш дене тӧр каяш манын, тунемман, шуко палыман. Эн тӱҥжӧ – кумыл лийже, а йӧн эре лектеш, – манеш Виктория.Вика Богданова

 

- Тунемме  деч вара жапым кузе эртарет?

- Кокымшо курсышто тунемме годым  фото-влакым ышташ кумыл лектын. Икымше фотом совет жапысе  «Зенит»  плёнкан фотоаппарат дене ыштенам. Икатаж 10 снимке лийын, очыни. Оласе пӱртӱсым, еҥ-влакым,  кушкылым войзенам. Плёнкан фотом ыштыме годым нигунам от пале, могай тудо лиеш. Икмыняр жап гыч, стипендий оксам поген, зеркальный камерым налынам да фотожурналистикыште шке вием тергенам.

- Фото-влакым ыштенат, а иктаж-кушко нуным луктат?

- Тений Татарстан Республикысе студенческий  шошо фестивальыште «Журналистика» направлений лийын. Тушко мый шке ыштыме фото-влакым  колтенам да «Фотоматериалы» номинацийыште сеҥенам. Тыгак Ставропольыш студенческий шошо фестивальыш миенам. Тушто мылам шуко ой-каҥашым пуэныт, сандене   тений кеҥеж гыч сӱаным, пайремым, тыглай фото-влакым войзем. Пытартыш жапыште шижам: фотом ышташ мылам кажне кечын чотрак келша. Тылеч посна шочмо марий калыкем нерген фотопроектым ышташ шонем.

 

- Вика, мый палем, тый тыгак шергашым, кӧржым ыштет. А кӧ тидлан кумылаҥден?

- Мыняр шкемым шарнем, эре кушкылым йӧратенам, гербарийыш коштен погенам. Но чаманен каласыман, коштымо кушкыл кужун огеш аралалт. Кодшо телым ювелирный  кишым ужынам. Лышташ ден пеледыш-влакым тиде кишыш пыштымеке, ий падыраш гай койын пеҥгыдемыт. Тыге мый тӱрлӧ ӱзгарым ямдыленам да шкеак пижыктен коштынам,  пӧлек семын йолташем-влаклан южгунам пуэнам. Варарак палыдыме еҥ-влакат йодын возеныт. Кызыт изи кевытлашке ужалаш пуэм.

 

- Тыгак  шуко форум ден фестивальыш коштат. Тений миен коштмо гыч мо шарнымашеш кодын?

- Тений кеҥежым Марий Турек район Сардаялыште «Кружок» фестиваль лийын. Марий ялыште лийше фестиваль, тулото йыр мурен шинчыме, пӱртӱс лоҥгаште кочмо, марий муро ден куштымаш-влак, ялысе калык дене палыме лиймаш, школ спортзалыште дискотке – чылажат шарналтен, уэш тушко пӧртылмӧ шуэш.

- Самырык-влаклан могай тыланымашет лиеш?

- Илышыште шке вердам кычалаш ида ӧр. Кызытсе жапыште шуко йӧн уло, тудым кучылтын гына моштыза. Йӧратыдыме пашалан жапдам ида пытаре, чонлан келшыше пашам кычалза! Тылеч посна шуко форум ден фестиваль эратаралтыт, тушкат миен толаш ида лӱд!  Чолга лийза!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: