"Сылнылык тӱня" рубрик, 2018 ий, Кылме тылзын 30-шо кечыже

Шуко спектакльыште – Маска

Статьян авторжо Анастасия Эманова

Тиде арнян Курчак театрын марий труппыжо гастроль дене Ижевск ола гыч толын. Одо кундемыште илыше йоча-влакым да нунын ача-аваштым ныл кече мастарлыкше дене куандарен. Труппын ик эн уста да самырык артистше Егор Ярандаев дене палымым ыштена. 27 ияш рвезе Волжск олаште шочын-кушкын. Озаҥ оласе тӱвыра да сымыктын университетым тунем пытарен. Марий курчак театрыште 2015 ий июль годсек пашам ышта.

IMG_5658- Егор, гастрольда кузерак эртен? Ончышо-влак сайын вашлийыныт?

- Ижевскыште гастрольнам пеш оҥайын, веселан да пайдалын эртаренна. Ты годым каласыман, удмурт курчак театрын артистше-влак Йошкар-Олаште спектакль-влакым ончыктеныт. Тыгай вашла эртарыме гастрольым Марий Эллан 100 ий теммылан пӧлеклалтше проект почеш ыштенна. Ме «Снежная королева», «Приключения поросёнка Фунтика» да «Колобок» постановко-влакым ончыктенна. Зал кажне гана тич лийын. Такшым кеч-куштат тӱрлӧ театрла гыч толшо артист-влакым ончаш шукын толыт.

- Ярандаев фамилий рушла ок йоҥго, марла мутланыметымат колын омыл…

- Чынак. Ачам мыйын чуваш, садлан фамилием тыгай, а авам – руш.

- Тый Озаҥ оласе тӱвыра да сымыктыш университетым тунем пытаренат. Тушеч  драме театрын да кинон артистышт лийын лектынат. Курчак театрышкыже тугеже кузе логалынат?

- Ойлен кодымо шуэш: Волжск оласе ик школышто тунемме годым 9-ше класс гыч 11-ше класс марте театр студийыш коштынам. Лач тунам актер пашам йӧратен шынденам. Тидланак кӧра тӱвыра да сымыктыш университетыш тунемаш пуренам. А курчак театрыш мыйым пӱрымаш, очыни, конден. Мыйын келшыме ӱдырем Константинов лӱмеш руш драме театрыште пашам ыштен (кызытат тушто модеш). Мый тудын дене пырля ик театрыште пашам ышташ шоненам. Дипломым налмеке, руш драме театрыш  толынам, «тыланда актёр кӱлеш мо? манын йодынам. А мылам «огеш кӱл» манын вашештеныт. Ик ий тӱрлӧ пашам ыштенам. Кажне гана таҥемым театр гыч вашлияш, тудын модмо спектакльышкыже коштынам да шке семынем кӧраненам. Чонем сценыш ӱжын, творчествым йодын. Тидым тудо ужын да, Опер да балет театрлан келшен толшо артист омыл, ны мурен, ны куштен ом мошто, а Курчак театрыш пурен ончаш темлен. Театрын художественный вуйлатышыже Алексей Анатольевич да актёр Александр Сильвестров мыйын мастарлыкем тергеныт. Пашаш пураш манын, мый ала-могай произведений гыч ужашым тунемынам. Чыла сайын ойлен пытарымеке, художественный вуйлатыше мылам курчак дене модын ончыкташ кӱшта. Пӱжалт-пӱжалт, чытырен-чытырен, Мераҥ курчакым тӱрлӧ семын «модыктышым». Тунам мый икымше гана планшет курчакым кученам ыле. Александр Иванович мылам йоҥылышем-влак нерген ойлыш, кузежым ышташ умылтарыш. Тунам Александр Ивановичым икымше да пытартыш гана ужынам ыле. Но ойлен кодымем шуэш, шке пашажым йӧратыше, театр дене илыше айдеме лийын.

Мыйым пашаш налыныт, марий труппыш логалынам, амалже — тушто пӧръеҥ артист-влак ситен огытыл.

 Панночка - Спирид 1- Курчак театрыш толметлан от чамане? Нелын тунемалтын?

- Куштылгыжак лийын огыл. Театрын артистше-влак Нина Ильинична Голованова, Максим Белецкий мылам полшен шогеныт, посна занятий-влакым мый денем эртареныт. Но тиде театрыш логалмемлан моткоч куаненам. Тыште шке верем муынам. Тӱрлӧ курчак дене пашам ышташ логалеш. «Машенька и медведь» спектакльыште тростевой курчак дене пашам ыштена. Мый тушто Маска улам. Курчак пеш кугу да неле, садлан кид вашке тӱҥеш, садлан ширме шеҥгелне мылам вес артист ты курчак дене модаш полша.

- Егор, шуко спектакльыште, мутлан,  «Колобок», «Машенька и медведь», «Морозко», «Теремок» постановкылаште тый Маскам модат. Оҥай палаш, молан?

- Мый шкежат маска гай лопка улам, йӱкемжат кӱжгӧ. Такшым йӱк шотышто ойлаш гын, курчак театрын артистше-влаклан ик спектакльыштак икмыняр рольым модашышт перна, а кажне образ шкешотан, йӱк дене ойыртемалтше. Тидым артистлан ончыктен моштыман.

- Тений шыжым театрыште кугыеҥ-влаклан «Панночка» спектакльым ончыктенда. Тый тушто Спиридым модат. Курчакдыме постановкышто модаш кузерак?

- Кум ий пашам ыштыме жапыште драме театрым монденамат. «Панночка» спектакльыште модаш тӱҥалме нерген постановкым ончыктымо деч вич кече ончыч пален налынам. Репетиций годым мый эре кушто курчак манын шоненам. Но вашке тунемын шуынам. Режиссер-постановщик Татьяна Лядова ролем сайын модынам манын ойлыш.

- «Как Артемка мир спасал» спектакльыште (кодшо тургымышто премьерже лийын – авт.) Всезнайын рольжым мастарын модынат. А илышыште тый персонажет гаяк чыла палаш тыршыше улат?

- Чыла аланыштат шинчымашем пойдараш тыршем. Уш-акылем ончыкташ ом вожыл, южо еҥ южгунам мо ушанла коят манынат ойлен кертыт.

- Курчак театрыште тылат мо келша?Приключения Фунтика - Фокус-Мокус 1

- Чыла. Поснак курчак постановкышто импровизироватлаш лиеш.

- Йӧратыме спектаклет уло?

- «Золотой цыпленок» постановко. Тушто мый пирын пурла копажым модам. Спектакль шӱм-чоным тарватыше, кумылым савырыше. Тудым изижге-кугужге ончышаш улыт, шонем.

- 5 декабрьыште «Йӱд орол» спектакльын премьерже лиеш. Мо дене тудо калыкым сымыстара?

- Спектакльыште шуко марий сем, мут-влак йоҥгат. Галина Николаевна Ямаева марла ойлаш, чын мут пералтышым шындаш туныктен. Спектакльыште мый Суксым модам. Постановкым марий фольклор негызеш шындыме. Режиссер-постановщик – Алексей Ямаев композитор Григорий Архипов. Моло спектакль деч тудо шуко куштымаш, пластике, маске дене ойыртемалтеш. Терменвокс, глюкофон, электрокӱсле семӱзгар-влакын семышт ала-могай мистике шӱлышым луктыт. Сем, декораций, персонаж-влак – чылажат оҥай, юзо. Толза ончаш.

Егор Ярандаев весела, ушан рвезе. Коеш, тудо йоча кумылым савырен мошта. Самырык актерым пашаштыжат аклат. Тӱрлӧ конкурсышто сеҥымаш шотышто ойлаш гын, Егорын эше чылажат ончылно. Но, мыйын шонымаште, актерлан эн кугу ак – йоча-влакын, нунын ача-аваштын тауштымо мутышт, спекаткль деч вара шокшо кидсовышт. А тидыжым Е.Ярандаев кажне гана шижеш, очыни.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: