"Рубрик деч посна", 2018 ий, Теле тылзын 7-ше кечыже

«Йӱржö йӱреш» муро гармоньчо лияш кумылаҥден

Статьян авторжо Елена Годунова

Женя2Кеч-могай творческий еҥын усталык корныш кузе логалмыже нерген пален налаш оҥай, очыни. Иктышт изинек артист, мурызо, куштызо лияш шонен кушкыт гын, весыштлан Юмо мастарлыкым пуа, кумшышт вучыдымын тыгай корныш логалыт. «Марий памаш» ансамбльын участникше Евгений Ивановым гармоньчо лияш, мутлан, «Йӱржö йӱреш» муро кумылаҥден. Мутем Женя нерген.

Рвезе — Параньга район Кугу Штрамарий почиҥган шочшыжо. Тысе школ деч вара Кугу Пумарий школышто тунемын. Женя изи годсек спортлан шӱман кушкын, тӱрлö вере заниматлен. Но ончыкылык профессийжым тӱвыра илыш дене кылден. Йошкар-Оласе тӱвыра да сымыктыш колледжыш семӱзгар пöлкашке тунемаш пурен. Ты профессийым ойырен налмыж нерген тудо тыгерак мане:

- Гармоньым шокташ тунемаш тӱвыра да сымыктыш колледжыш тунемаш пураш шоненам. Тылеч ончыч шкежат гармоньым изиш «шупшкедаш» толашенам, но профессионал шоктызо шинчымашым налмек веле лийын кертмем умыленам. 16 ийым темымеке, ялысе клуб ансамбльыш кошташ тӱҥалынам. Концертмейстер Иван Иванович Ивановын шоктымо «Йӱржö йӱреш» мурыжат, гармоньым шокташ тунемаш таратен шонем. Клуб деч вара мöҥгыштö ачамын гармоньжым кидышкем налынам да мончаште «Йӱржö йӱреш» мурылан семым лукташ толашен шинченам. Ачам Григорий Александрович — самодеятельный гармоньчо. Чонжо йодмо почеш семӱзгарым кидышкыже налеш да тӱрлö семым луктеш.

Гармонь деч посна кызыт гитаре, баян, балалайке, шӱвыр дене шоктен моштем. Южгунам нине семӱзгар-влакым кидышкем налам.

Кызыт Женя нылымше курсышто тунемеш. 2014-2015 ийлаште армийыште службым эртен: войсковой частьын оркестрыштыже труба да саксофон дене шоктен. Ойлымыж почеш, тушко музыкальный грамотым да нотым палыше рвезе-влакым погеныт. Арнялан кок гана оркестрыште шоктышо-влак кечыгут манме гаяк тӱрлö семӱзгар дене шокташ да молыланат тунемыныт. Оркестр тӱрлö пайремлан концертым ончыктен. Туштак Женя труба да саксофон дене шокташ тунемын.

Ж.Иванов — «Марий памаш» ансамбльын чолга участникше. Тушто тудо тӱҥ шотышто гармоньым шокта, тыгак мура, кушта. Ансамбль дене пырля Российын тӱрлö олалашкыже лектын коштыт. Конкурслаште, фестивальлаште участвоватлат. Тыге Владимир олаште эртаралтше «Золотое кольцо», Карелийысе Петрозаводск олаште «Эпосы народов России в гостях у Калевалы» фестивальлаште да моло вереат лийын. Тылеч посна республикысе тӱрлö гармонь конкурслашке кумылын ушна. Икымше вер дене палемдалтын огыл гынат, тӱҥжö – калык ончылно чон канен шоктымо мом шога, манеш тудо.

Каласыман, Женя тӱрлö пайремыште, сӱаныште, лӱмгечыште калыкым гармонь сем почеш куштыкта, мурыкта. Самырык гынат, тудым шуко вере ӱжыт. Кызытеш Параньга, Шернур велне ятыр пайремыште лийынам, манеш. Ончыкыжым оркестрыште шокташ шонымашыже уло. Тыгак кӱшыл шинчымашым налаш уто огыл, манеш. А айдеме ончыкылык нерген шона гын, тугеже чылажат шонымо семын лиеш. Тидлан шонымашке шуаш кыртмен тыршыман, очыни. Тугеже чылажат ончылно!

Женякушта

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: