"Рубрик деч посна", 2018 ий, Теле тылзын 14-ше кечыже

Йӱштö кочалан серышым возеда?

Статьян авторжо Елена Годунова

Вашке — эн вучымо У ий пайрем. Тудым изижге-кугужге чон вургыж вучат. Ава-ача-влак пöртым сылнештарат, лишыл еҥ-влаклан пöлекым ямдылат гын, икшыве-влак Йӱштö кугызалан серышым возат. Тендан йочада серышым воза мо? Йӱштö кугыза пöлекым пöлеклыже манын, йочада могай койышым ончыкташ тырша? Ава семын тыгодым мом ыштеда?

Татьяна Васильева:

- Эргым вич ийым эрталтен. Кажне У ийлан Йӱштö кочалан серышым возена. Мут-влакым шке гыч возен ок мошто, садлан могай пöлекым вуча, альбом лаштыкеш сӱретла. Тудым моторын пӱтырен, кож йымаке пыштена. У ий йӱдым Йӱштö коча серышым налеш да пöлекым пыштен кода. Йочан куанымыжлан пуйто мучаш уке, тудым ончен, меат йывыртена. Серышым возымо деч вара эргына шкенжым эреак сайын ончыкташ тырша, очыни, пöлек деч посна кодын кертмыжым умыла. Ӱмаште, мутлан, ӱстембал хоккейым йодын ыле, тений самолёт конструктором вуча.

КарнавскаяКарина Карнавская:

- Йӱштö кугызалан серышым возымо татым, ача-ава-влакат, очыни, чон вургыж вучат. Кунам эргым серышым воза, мыйынат чоныштем куан кумыл озалана. Вет тыгодым тудын шинчаже кавасе шӱдыр семынак йӱла. Эргым вич ияш, садлан серышым мый возаш полшем. Серышыш У ийлан келшыше тӱрлö наклейкым пижыктена, сӱретым сӱретлена. Тидыжым тудо шкеак ышта. Ямде серышым почтыш мый наҥгаем. Серышым колтымо деч вара пöлекым изин-кугун вуча, але изи улына, садлан юзылан ӱшанена. Ӱмаште пульт дене виктарыше машинам йодын ыле, тений эше серышым возымо огыл.

пуртоваАлина Пуртова:

- Ӱдырем кум арня ончычак Йӱштö кочалан серышым колтен. Буквам пала, садлан шкеак возен. Шканже веле огыл, мыланнат — аваж ден ачажлан да изи шольыжлан — пöлекым йодын. Шканже юзо тоям, мылам тувырым, ачажлан металлоискательым, шольыжлан машинам. Пöлекым пöлеклыже манын, мутым колыштеш, мылам полшаш тырша. У ий йӱдым Йӱштö коча пöлекым кож йымалне кода. Очыни, йоча-влаклан веле конда, вет кугыеҥланат «нумалаш» тӱҥалеш гын, мешакше пеш неле лиеш. Тудын ынде ийготшат уло, тидым йочалан умылтараш тыршена.

СоколоваТатьяна Соколова:

- Эргым тений икымше классыш каен. Кажне ийын Йӱштö кочалан серышым воза. Тидлан моткоч ӱшана. Ончыч тудын олмеш мый возенам гын, тений шке возен. Шукыж годым машинам, тудлан кудалме корным йодеш. Йочан юзылан ӱшанымыже ача-аванат кумылыштым тарвата. Садлан ты татым меат чон вургыж вучена. Тыгодым, чынжымак, эн пиалан, весела улмо шижалтеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: