"Изи тӱня, кугу тӱня" рубрик, 2018 ий, Теле тылзын 7-ше кечыже

Кова лийын мо?

Статьян авторжо Ирина Степанова

Тений ӱдырем дене Шем теҥыз воктеке канаш миен толна. Корнышто поездыште ик ӱдырамаш шуко оҥай историйым каласкалыш. Иктыже лач «Изи тӱня, кугу тӱня» лаштыклан келшен толеш. Теве тыгерак ойлыш.
Мый кажне кеҥеж каникулым ковам дене ялыште эртарем ыле. Ковам кечыгут фермыште пашам ыштен, а кочам комбайнер лийын. Садлан мӧҥгыштӧ шкетак «пӧрдалынам»: модынам, йӱштылаш коштынам. Эше ковамын пакча шеҥгелнысе изирак пӧртыш кошташ йӧратенам. Тушто поро кумылан кува илен. Мый шке семынем тудым эре тӱрлын сырыкташ тыршенам: я почешыже шып гына рокым шуэм, я пырыс гай кычкырем, я эше иктаж-мо. Кова мыланем нигузеат вашештен огыл, вурсенат огыл. Икте мыйым ӧрыктарен: тиде кува эреак ик вургем дене коштын: шем кужу юбко, ош шовыч да шемалге кофто. Тудо эше нигунамат пелештен огыл. Киносо гай пӧртшӧ гыч эркын гына лектын да кудывечыж мучко тошкештын. А мый шып гына тудым пече вес могыр гыч онченам да тӱрло кӱлеш-оккӱлым ыштылынам. А шкеже ковамлан тидын нерген ойлен омыл: тудо сурт деч торашке кайымылан эре вурса ыле.
Тиддеч вара иктаж 10 ий эртыш. Мый, школым тунем пытарен, вузыш пурышым. Икана ковам деке толмеке, авам деч саде сурт да тушто илыше кува нерген йодым. Тыгак саде шоҥго кувам эре шӱрдылмем нерген каласышым. Авам кагаз гай ошем кайыш. Мыйын тыгай уда койышемлан огыл, а йӧршеш весылан. Вет тудо пӧртыштӧ илыше кува мыйын шочмем деч ончычак колен, да тиддеч вара саде сурт эре яра шинчен. Тугеже кӧм мый тушто ужынам? Шоҥго куван чонжым мо?
Ольга.
Йошкар-Ола.

Кӧ лӱдыктен коштын?
Мый ялыштак илем ыле дыр, но суртем чот тоштеммылан кӧра ӱдырем деке тора олашке илаш куснышым. Яра кияш огыл манын, кеҥежлан сад-пакчам нална. Мый ялысе улам, садлан шыже марте тушто илаш, пакчсаскам кушташ шонен пыштышым.Адакшым тиде дачым шулдын ужаленыт да, электричке гыч волымеке, корно деч тораште огыл лийын.
Ӱдырем ден веҥым мыйым конден кодышт да шкешт мӧнгеш кудальыч. Садыште мылам пеш келшыш. Кечыгут сомыл дене шогылтым, пакчам эрыктышым, росотам шындыльым. Кастене малаш возым веле: пӧрт мучко йӱк шокта, пуйто ала-кӧ эре коштеш. Чонлан сайын ок чуч, лӱдынат колтышым, но шкемым шижтарышым: тиде коля-влак озаланат. Тугеже эрла аярым оптен лекман. Вара мален колтышым. Эрлашыжым кечыгут коля дене «кучедальым»: аярым оптен лектым, шӱкшакым кӱрым. Но кастене адак йӱк шокташ тӱҥале. Я кӱвар кочыртата, я пуйто окнам перкалат. Лӱдаш тӱҥальым да пошкудо деке лектын кайышым. Тиде йӱдым пошкудо денак эртарышым. Тудат тений веле дачым налын, садлан мыйын участке нерген нимом удам ом пале мане. Эрлашыжым вес пошкудо деке ошкыльым. Тудо умылтарыш: жапше годым ты пӧртыштӧ ик бомжым пуштыныт. Тудым кушто тоеныт, нигӧ ок пале. Очыни, тудын чонжо коштеш, да чылаштым лӱдыкта. Тиддеч вара ты пӧртыштӧ нигӧ илен кертын огыл. Мо ышташат ӧрым. Участке мылам келша, но тыште илаш ок лий. Лӱдмӧ дене ушым йомдараш лиеш. Мый черкыш бачышка деке кайышым, можым-кузежым умылтарышым. Тудо тольо, осал деч чыла эрыктен кодыш. Чынжымак, ик жап гыч тыште йӱк шоктымым чарныш. Кызыт ынде ласкан илем.
Ольга Николаевна,
Ленинградский область.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: