"Кузе илет, ялем?" рубрик, 2018 ий, Теле тылзын 7-ше кечыже

Микракыште пашам йöратат

Статьян авторжо Ирина Ямбаршева

Сентябрь, октябрь, ноябрь тылзе-влак паша коклаштак шижде эртен кайышт. Ты жапыште Курыкмарий районысо озанлыклаште тыршыше, фермер, посна еҥ-влак нурышто, пакчаште пареҥгым луктыч, ковыштам поген нальыч. Микракыш октябрь-ноябрьыште мийымем годым урем дене ковыштам оптымо тележкан трактор-влак кудалмым ужым. Ончем: кугу автомашина кузовлаш ковыштам оптат. Тыштак Микрак ял шотан илем администраций вуйлатыше Б.З.Васютин дене вашлийна, фермер-влакын лÿмыштым йодым. Борис Зиновьевич каласыш: «Пакчасаскам куштымаште «Деметра» ООО ойыртемалтеш. Изак-шоляк-влак Александр, Сергей, Николай Пекунькинмыт пашаштым моштен виктарат. Посна фермер-влакым палемдаш лиеш. Тиде – Василий Самойлов, Сергей Илларионов, Геннадий Коротков, Иван Карпов, Александр Митрюшкин, изак-шоляк Митинмыт да молат. Нуно техникышт дене яллаште илыше-влаклан полшат».

Фермер-влакБорис Зиновьевич мыйым самырык фермер Сергей Илларионов деке наҥгаен кодыш. Ончем: палыме еҥ-влак улыт. Иктаж кок ий ончыч Сергей Николаевич дене вашлийынна ыле, тунам, ковыштам шупшыктымо годым, мутланаш ыш ярсе. Кызытшат нурыш каяш вашкыш, но кутыралташ жапым муаш тыршыш. Сергей Николаевич мане: «Куш пурет, ялыште шочынна гын, кресаньык пашам ышташ кÿлеш. Изинек паша дене кушкынна».

Воктенак ачаже, Николай Петрович, эргыжлан мо кертмыжым ышташ полша. Шке жапыштыже «Рассвет» озанлыкыште механизатор-комбайнерлан ыштен. Пелашыже Ирина Николаевна дояркылан 20 ий ыштен, а кызыт — складовщице, учетчице. Осеменатор, ферме вуйлатыше лийын.

Сергей эргышт кресаньык шÿлышан кушкын. Тудо мане: «Ялыштат илаш лиеш. Теве у пöртым чоҥена». Вара ачаже мутланымашке ушныш: «Пашам ыштен моштыман, неле деч лÿдман огыл. Эргымлан мланде паем пуэнам. Йöным кычалеш, толаша».

Сергей Илларионов — пеш писе айдеме, мутланаш йöратыше, икойыш шуын мошта, виян. Тудо тыге каласыш: «Чылажымат шкетын ышташ жап ок сите. Пелашем Любовь Витальевна дене пырля тыршена. Тудо документацийым, учётым ышта».

- А ковыштам налше-влак улыт мо? Ковышталан ак могайрак? — йодым.

Пöръеҥ куанен вашештыш: «Тений ковыштам налаш тышкак толыныт. Владимир, Кострома олалаш, Архангельск областьыш колтенна. Ак келшыше, пакчасаскам кушташ кумыл уло. Эше ковыштам аралаш пыштенна, телым да шошымат окса лийже».

Тыге, каҥашен, Сергей ден Любовь Илларионовмыт пасу пашам виктарат, техникышт уло. «А кузе умбакыже илаш — жап ончыкта», — маныт. Ялозанлык пашам шукташ Российыште сай политике веле лийже. Вара Илларионовмыт семын самырык-влак еш илышым ялыштак чоҥаш тÿҥалыт.

А кызытеш… Сергей Николаевич тыге ойлыш: «Соляркылан ак эре кÿза. Шул-дыракым кычалына. Элна икте — соляркылан, бензинлан ак чыла вере икгай, себестоимость семын лийже ыле. Россий правительстве акым ик кÿкшытыштö кучаш кÿштен. Ӱшанена, кресаньык-влакымат нефть оза-влак шотыш налыт. Ме пакчасаскам нуныланат вет колтена».

С.Н.Илларионов да вес фермер-влак мландым перегыме, пайдалын кучылтмо верч тургыжланат, севооборотым шотыш налыт. Чылан палат: ковыштам эре ик вереш шындаш ок лий: чер налын кертеш. Садлан Сергей Николаевич ковыштам куштымо почеш пырчымат ÿда. Тудым шке вольыкшылан пукша.

Сергей Николаевич ялысе социальный йодыш-влакым решатлымаште öрдыжеш огеш код, телым техникыж дене ял уремлаште лумым шÿка. А Микракыште илыше еҥ-влак ял шотан администрацийым вуйлатыше Б.З.Васютин дене пырля ял урем корным тыгыде кÿ дене леведыныт. Эх, асфальтымак шараш ыле, но окса шуко кÿлеш. А оксажым фермер-влак шергакан соляркылан веле пÿжвÿдым йоктарен ыштат.

Пашаче еҥ-влаклан кöра ял ила. Ял уло — йоча-влак кушкыт, школ ила — марий йÿла аралалтеш, Микракын кÿсле семже йоҥгалтеш.

И.ЛОБАНОВ.

Авторын фотожо.

Комментарийым ешараш:

Войти с помощью: