"Погонан рвезылык" рубрик, 2018 ий, Теле тылзын 17-ше кечыже

Уым кычалын, клубым почын

Статьян авторжо Вероника Мустаева

 


VPK zarya

Марий радиомеханический техникумышто «Заря» военно-патриотический клуб уло. Тудым Юрий Пурынычев вуйлата.

Ондак рвезе Йошкар-Оласе 28-ше №-ан школышто тунемын, вара 21-ше №-ан школыш кадет классыш вончен.  Кӱшыл шинчымашым военный направлений дене налаш шонен, но шонымашыш шуын огыл. Тунем пытарымеке, Иваново олаште воздушно-десантный войскаште службым эртен, сапёр лийын.

Армий деч вара Марий радиомеханический техникумыш тунемаш пурен. Тыгодымак рвезе вожатыйлан тунем лектын. Шап ер воктене йоча лагерьыште, неле илыш ситуацийыш логалше йоча-влаклан Юрино районысо«Трамплин» лагерьыште  вожатыйлан пашам ыштен. Пел ий тунеммеке, Юралан ала-мо ситыдымыла чучын, уым кычалын.

-Тылеч вара, кушко каенат, мом ыштенат?

-Ондак колледжыште ОБЖ предметым туныктышо дене палыме лийынам.  Тудо «Шарнымаш вахте» мероприятийым эртараш еҥ-влакым поген. Мыят ушненам, командир лийынам. Мероприятий эртымеке, туныктышо деч военный клуб молан уке манын йодыштынам, тудым ышташ темленам.

Паша шуко лийын. Индеш тылзе материалым, документым погымо, клубын кӱлешлыкше нерген каҥашыме. 2016 ий тӱҥалтыште икымше группым поген шуктымо. Ондак вич еҥ ыле гын, тылзе гыч луын погыненыт.VPK

Тудо ийынак, 24 апрельыште, «Заря» военный клубым почыныт да Юрийым вуйлаташ шогалтеныт. Идалык мучашыште Ростов-на-Дону олаште эртаралтше военный клуб шотышто проект  дене конкурсыш миеныт. Тушто 3-шо верыш лектыныт. Тиде сеҥымаш деч вара вес форум ден конкурслаште шке вийыштым тергаш тӱҥалыныт.

2017 ийыште «Заря» клубыш коштшо-влак Йошкар-Олаште Сеҥымаш кечын парадыш лектыныт.

- Парадыш лекташ йӧным кузе муында?

- Тиде паша куштылгыжак огыл. Мемнан икгай вургемна лийын огыл, а вургемым налаш 100 тӱжем окса кӱлын. Шийвундым мыланна техникум пуэн. Тылеч вара Йошкар-Олан военный комиссарже Валерий Константинович Панков дене кутырен келшенам. Парадлан рвезе-влакым шкеак ямдыленам. Тений парадыште кокымшо гана участвоватленна. Ӱшанем, умбакыжат парадыш ушнена.

«Заря» военно-патриотический клубышто занятий-влак  тунемме деч вара арняште кум гана –  шочмын, вӱргечын да кугарнян – лийыт. Нуно лекций семын эртаралтыт, туштак практический пашалан: автоматым рончен-погаш, лӱйкалаш,  кучедалаш, строй дене кошташ – туныктат.

- Кызыт тушто могай пашам шуктет?

- Военный модыш-влакым, эстафетым, лӱйкалымашым техникумышто  эртарена.  Тыгак парашют дене тӧршташ ямдылалтына. Россий ДОСААФ-ын Марий Элысе отделенийже дене кылна пеҥгыде, сандене кутырен келшыме почеш тӧршташ лиеш. Парашют дене тӧршташ кумылан-влак эн ончыч мемнан дене тунемыт, вара ДОСААФ-ыште эртарыме курсыш каят.

Шукерте огыл «Заря» клубыш коштшо-влак курсант лӱмым налыныт. 12 ӱдыр-рвезе «Заря» ешыш ушнен. Россий ДОСААФ-ын  Марий Элысе отделенийжын  председательже подполковник  Вячеслав Тихонов клубын кажнеучастникшылан удостоверенийым кучыктен.

VPK присяга

- Клубда умбакыже кузе пашам ышташ тӱҥалеш? Могай у шонымаш-влак улыт?

- «Заря» военно-патриотический клуб дене олаласе да районласе школлаш лектын кошташ шонена. Кызыт 7-13 ияш-влаклан мастер-классым  эртарена. 9-11-ше класслаште тунемше-влак денат вашлийына.

- Тиде клубыш коштмо могай пайдам пуа?

- Клубыш коштшо-влак шукыж годым вигак армийыш каят, сандене ме сай характеристикым возен пуэн кертына. Клубыш коштшо ныл рвезе служитлен толын. Тыште налме шинчымаш армийыште полша маныныт.

- «Заря» клубышкыда кӧ коштын кертеш?

- Клубыш кажне кумылан еҥым вучена. Мемнан деке  Волгатех, МарГУ, МОСИ,  МРМТ да моло тунемме верла гыч коштыт. А ик рвезе Йошкар-Оласе 4-ше №-ан гимназийыште тунемеш.

Вероника МУСТАЕВА.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Сайтыш пураш: