"Илыш йогын" рубрик, 2018 ий, Теле тылзын 7-ше кечыже

Шем экраным ынеда уж гын…

Статьян авторжо Ирина Ямбаршева

Кызыт республикыштына аналоговый телевещаний гыч цифровой телевиденийыш куснымо паша кая.

Dvurechensk-2Марий Эл Республикыште 31 объектым чоҥымо да пашаш колтымо. Икымше мультикомплексын   (РТРС-1) телеканалже-влакым («Первый канал», «Россия 1», «Матч ТВ», НТВ, «Пятый канал», «Россия К», «Россия 24», «Карусель», ОТР, «ТВ Центр»), тыгак кум радиоканалым («Вести ФМ», «Маяк», «Радио России») чыла населенный пунктышто ончаш да колышташ лиеш. Тыгак «Россия 1», «Россия 24» да «Радио России» каналлашке «Марий Эл» ГТРК пура, садлан шке кундемысе увер-влакым пален шогаш лиеш.

Кокымшо мультикомплексын (РТРС-2) каналже-влакым (СТС, ТНТ, «РенТВ», «Пятница», «Спас», «Домашний», «Звезда», «ТВ3», «Мир», «МузТВ») Йошкар-Олаште да туддеч 30-40 меҥге тораште верланыше населённый пунктлаште ончен кертыт. Ноябрь мучаште Волжский, Звенигово районлаште, декабрь тÿҥалтыште Курыкмарий ден Юрино районлаште тестовый трансляций тÿҥалын. Но 2018 ий мучашлан у йöн моло вереат миен шуэш. Икманаш, нылымше кварталыште икымше мультикомплексын сигналжым налше-влак кокымшо мультикомплексын сигналжым ешартыш оборудований деч посна эркын дене налаш тÿҥалыт.

РТРС-1 ден РТРС-2 мультикомплекс-влакын программыштым ончымылан оксам тÿлыман огыл. Ешартыш оборудований (ДМВ-диапазонан антенне да DVB-Т2 цифровой стандартан телевизор, але улшо телевизор деке приставкым ушаш лиеш) гына кÿлеш.

Цифровой эфирный телевещанийым авалтыдыме верлаште илыше еҥ-влакынат (0,43%) нине 20 телеканалым ончаш йöнышт лиеш, но спутниковый вещаний оператор-влакын абонентский приемникыштым (НТВ-г, Триколор ТВ) налман.

2019 ий январь гыч аналоговый телевещаний огеш лий. Садлан цифровой сигналым налаш ямде огыда лий гын, аналоговый вещанийым йöртымеке, федеральный телеканал-влак олмеш шем экраным ужыда.

Тыгак РТРС начарын колшо-влаклан телевизорым субтитр дене ончаш йöным пуа. Тудым чÿкташ манын, пультышто телетекстлан кнопкым темдалман. Субтитр-влак «Первый каналыште», «Пятый каналыште», «Россия 1», НТВ, «Россия К», «ТВ Центр», «Карусель», «Спас», «Матч ТВ» каналлаште улыт.

Цифровой телевидений да тудым чÿктымö нерген утларак палынеда гын, СМОТРИЦИФРУ.РФ сайтыш пурыза але РТРС-ын «шокшо линийышкыже» (8 800 220 20 02) йыҥгыртыза.

Комментарийым ешараш:

Войти с помощью: